由一開學到而家,除左頭o個個月係有人車之外,10月到而家都係自己朝朝搭巴士番學。由於我搭o個架巴士係每半個鐘頭一班,所以每一朝都係搭同一時間ge車,如果唔係就會趕唔切。

我搭而架巴士係6號,唔知點解,由細到大都好鐘意6而個字,由細細個舅父叫我揀六合彩number,到大個d去打波要揀6號波衫,再到做d咩心理測驗,最鐘意ge number始終都係6號。所以,而架6號巴士特別有親切感。

由於而架巴士係好少人搭ge關係,無論佢ge班次,還是巴士ge款式,都係又少又舊。除左咁之外,而架巴士所有ge野都係好好。

每一朝,都係同一樣ge身乘客,同一樣ge司機。每次上到而架巴士,會感覺到好似見到d朋友咁,會逐個逐個打招呼,有學生,有上班人士,亦都有老人家。最特別ge係,巴士司機。

佢係一個上左年紀ge老伯,雖然唔係好老,但係保守估計都有50幾歲。雖然係咁,但係佢好有中氣,亦都好精神。而個老伯叫做steve,佢每朝就係好似一個爸爸咁,車住佢d小朋友周圍去。佢對每一個乘客都好好,尤其係日日都見到o個d。每一次佢見我無搭幾日車,佢第2朝一見到我上車,steve就會好關心咁問我係咪病左,係咪唔舒服,係咪唔知醒,係咪唔開心。有一次,上到車先發覺我無晒ticket搭車,又無晒散銀,跟住steve同我講:你上車la,下次先俾番我la。佢真係一個好好ge司機,好好ge老伯。

直到前幾日,我照平時咁一樣上車,steve同我講,佢渣多1日就唔渣巴士la,佢retires la。雖然,我好替佢開心,但係,我個心唔知點咁。我問steve點解唔早d講俾我知,佢話:我唔想你唔捨得我。

上個星期3,係steve ge最後1日。

我一上車,我企左好耐都無將我手上ge ticket放入部機到,佢問我係咪無ticket同埋無散銀,我話係,因為我唔想佢走,如果我同佢講我無錢俾,佢會叫我下次俾。如果我無,我就再有機會見到佢。steve笑左一笑,就話:我今日last day,我請你搭la!我笑左一笑,但係唔知點解,我好想喊。

而一朝,平時半個鐘ge車程,好似過得特別快,我好想,好想坐耐d。

總站,要落車。

我係最後一個落車,亦都係steve最後一個乘客,因為佢話而一班係佢最後渣ge車。

我同steve講左句take care,跟住佢送左一粒佢話唔會溶ge朱古力俾我,叫我以後做任何事都要堅持,就好似而粒朱古力咁。最後,我俾左一個hug steve,而佢,都喊左出黎。當然,我咁眼淺ge人,o係而個moment當然會大喊。

一個大我幾十年ge老伯,唔同國籍ge老伯,唔同語言ge老伯,同我一d關係都無ge老伯,竟然會對我咁好。

之後,星期四同五,我都無搭巴士,但係有番學。因為我知道,steve再唔係我司機,以後再無一個司機會o係巴士站到等我5分鐘都唔見我先開車走,無司機再會俾我搭霸王車,無司機再會同我笑笑口咁問候我,關心我。

唔知道,星期一ge巴士司機會係點..不過,我一定會記住曾幾何時有一個咁錫我ge巴士司機,一個我為佢喊過ge巴士司機,仲有一粒永遠唔會溶ge朱古力。

多謝你,steve。