從未試過去其他地方去到不想離開酒店。我終於明白以前同事講，當人越大，越需要去環境較舒適的地方。

雖然今次是工幹，但經過安排後，我是有一日半自己時間。但昨天到步後，簡直完全唔想出去，整個下午都落大雨。坐的士去唐人街，又比個司機呃!!搭咗成三十幾蚊!仲要去咗唔知邊度!一去到，簡直嚇親，由於落完雨，周圍勁污遭!自己又病緊根本唔敢亂食嘢.....已經四點幾都未食lunch,本來想求其食麥當當等。但勁多人....咩事呀....去到附近的central market,噢,手信區....冇嘢食。
諗住坐的士回酒店附近的雙子塔，點知勁traffic jam....都唔知要坐幾耐。最後坐地鐵，車費只係三個幾...坐的士超貴呀!!

去到雙子塔簡直係兩個世界，至少係乾淨o既。但嘢食就好唔掂......已經去咗餐廳食，但好難食。算啦,好又一餐唔好又一餐，六點幾先食午餐，餓到就嚟腳軟。不過都唔平，一個人都食咗八十幾。

已經累到死，食完就快快回酒店休息。但不知是否太累，突然覺得自己瘦咗好多，眼紋又好勁.....唉,立刻瞓覺。

早上起身，望真啲間房，其實好靚。超大，張床瞓三個人都得。書枱同其他配套都好好。又近展覽會場，過對面馬路就係。大公司真係幾好。

琴日第一次坐商務客位，勁大鄉里。入到商務候機室後，唔知有咩做，個侍應醒水見我個樣都係第一次，就介紹我去食自助早餐。上到機，好驚呀!個空姐會知道你姓咩....仲要每次都問麥小姐,你要唔要試下咩,要唔要看什麼.....一餐早餐,上咗成個鐘。有機會，我真係好想坐下頭等，如果我有錢的話。