十點幾, 阿媽急call話麻煩人好暈唔舒服要立即去睇急症, 幾唔願起身都九秒九彈起, 刷牙洗面用左五分鐘就落去睇檔...

一睇...就睇到成點先返...照埋肺...醫生話佢咩事都冇 = ="
唔好話醫生...連街坊都知咩事啦. 街坊行過買報紙, 唔見阿媽就問去左邊, 一答話陪麻麻去睇醫生, 就明晒咁話...哦! 你阿媽佢地去左幾日大陸, 個心唔舒服呀, 真係吹到啤一聲 ~.~

阿媽返到又要買野俾佢食, 教佢分埋藥服侍周到之後, 就買飯服侍我老豆, 幫佢去銀行入數, 再之後返黎睇檔放我去食野, 食左半個鐘我就趕番去睇檔, 因為又輪到我阿媽去覆診 = =

一坐...又再坐到四點, 阿媽攪掂晒, 我終於可以返上樓攤抖下, 但又醒起要入數, 跑番落街攪掂晒就買左盒齋返去同佢地一齊食. 食完就返上樓, 訓左一個鐘頭懶覺就落去收檔.

雖然成日冇停過, 明明放假又要做, 連逗左利是都要同阿哥細佬分, 但係就搵番久違左既家庭溫馨. 屋企幾差始終都係我既避難所, 又冇壓力, 就算有問題, 自會有人解決, 真係想把心一橫, 辭職唔做. 不過再考慮清楚先啦...真係會認真諗諗...

////////////////////////////////////////////////////////////////////////

返到屋企食完飯, 就約左山山出去旺角, 行行企企, 睇中好多野又忍住冇買, 最後剩係買左份生日禮物俾._/.

開頭話搵地方飲野, 之後佢話要去買碟, 買左碟之後又改話上佢個狗竇睇碟, 之後就買晒啤酒零食上去睇一套原來都幾悶既"麻婆島" (如果我麻麻有佢地咁好就好喇)

明明話上去吹水, 一睇碟又咩都冇傾, 睇完碟都成點鐘喇, 佢就陪我落街等車, 點知企企下兩條友就係度吹水, 本來話三個字冇飛van就搭的士, 一傾就係條街度傾左成半個幾鐘 ^^" 如果唔係因為麻麻唔舒服係屋企, 真係會返上佢度繼續傾過