假期第一日 - 七點幾俾爸媽嘈醒, 佢地走左我就訓到十一點起身, 懶懶地到十二點半開始執屋. 因為尋日勞動得太緊要, 所以今日都係求求其其換床單, 抹睡房同執好個廳算數.

之後出去陪細佬買衫...陪之餘...最重要係我俾錢^^" 六點幾係APM會合佢, 就不停買買買, 佢連價錢都唔睇, 見順眼有尺寸就要, 全程由APM買到將軍澳, 一的都唔手軟.

由六點到十點, 扣除食左一個鐘飯的時間, 用左三個鐘頭, 佢就買左我四千八百幾蚊

包括: 兩件褸, 一件冷衫, 三件衛衣, 三件T-shirt, 三條牛仔褲, 一對鞋, 六對襪, 一條皮帶 = ="

============================================================================

到左十點幾佢趕住走, 我就同多多去行佢好想行既花市, 揀左就腳既將軍澳花市以為冇咩人啦, 點知都係要排隊等放人.

入到去買左幾隻雞丁公仔, 佢地話係真野, 不過真定假就唔知喇, 但係價錢就真係好抵~ cushion$48, 膠既大閃燈公仔$30, 細既發聲$20, 就算係假既手工都唔差呃得下人~

++++++++++++++++++++++++++++++++++++++++++++++++++++++++++++++++++++++++++++

行到十一點十閃人, 走既時候都知時間好趕, 但又唔想搭地鐵, 就趕去巴士站睇下啦, 多多問過佢阿哥, 都話冇車架喇, 我就同自己講: 如果咁都俾我咁好彩搭到尾班車, 我黎緊一年一定行大運, 話口未完...車就黎左喇 ^^V