今晚約埋兩個舊同事, 一行四人上左泰簡單食飯.

其實想試呢間好耐, 不過一直都冇機會, 今日下晝打去訂位既時候已經full晒得番露天檯, 好奇怪, 有冇咁爆呀?! 去到先知, 唔怪得啦, 因為佢七點都未夠就hold埋八點既檯喇...

好快睇完menu, 唔覺唔覺就叫左六樣野:
~炸蝦餅 = 真係幾好味, 炸完仲食到有蝦味
~香穌餅 = 普通啦, 因為等得咖哩黎都凍晒喇, 數量又少, 一人得半塊咋
~飛天通菜 = ok, 幾好味
~蔬菜奄列 = 幾特別, 不過咸左的, 同埋入面有好多我唔食既雜豆
~辣椒醬炒蟶子 = 都幾好味, 我嫌唔夠辣, 不過我同事就話辣得濟?!
~金枕頭(法式麵包包住呢咖哩) = 好新奇. 食既時候的麵包仲好脆, 不過的咖哩就太重椰汁味

大家食完都係覺得七分飽(唔知我係唔係大食左好多, 出街食飯次次都唔飽...)睇完menu又驚叫左食唔晒, 最後攻甜品喇...
~芒果黑糯米 = 芒果又凍, 糯米又熱, 加埋好似怪怪的
~南瓜布甸 = 幾好味, 不過估唔到又係熱既
~椰汁西米糕 = 好好味, 甜度岩岩好
~忙果糕 = 甜左的, 同埋好重香料味
~南瓜糕 = 怪怪的...可能因為我唔鍾意食南瓜
~香芋糕 = 有少少軟, 又硬硬地, 味道ok架, 不過質感怪怪的

總括來講, 都幾好味, 有時間可以再去過, 不過一定要訂位喇...