老婆婆個子唔高，但係好肥，行路o既時侯需要拐杖支持。
因為老婆婆患有高血壓，每隔兩個月老公公都會陪老婆婆去醫院覆診。
某夜，老婆婆o左邊身麻痺入院，經過電腦掃描顯示右腦出血。
我如實話比老公公知，老公公無出聲，只係無奈咁望住我,淚水湧現。
第二朝,意料之外，老婆婆o既情況唔係想像中咁壞，而且頭腦清醒。
入院之後既第五日，老婆婆問我 :「呢兩日伯爺公點解無o黎探我o既 ? 」
一個實習護士話比我聽，早兩日老公公突然心肌梗塞，住o左響對面o既男病房。
兩老無兒無女，最親o既都只係個姪仔。
今日， 姪仔帶o左兩樽果汁黎醫院，先去探老公公，再去探老婆婆。
過o左幾日，老公公o既病情剛剛穩定，就嚷住要出院照顧老婆婆。
經過一番溝通之後，主治醫生諗o左一個折衷辦法 。
首先老公公換番自己o既衫，坐住輪椅，由工友推到女病房門口，
而為o左安全起見，醫生護士都要跟埋老公公一齊 ...
老公公蹣跚地企起身，手執果汁，走到老婆婆床邊 : 「買比妳飲嫁。」
老婆婆嗲起o黎 :「呢幾日唔見你o既伯爺公，咩事呀 ? 病o左咩 ? 」
老公公微笑 : 「唔係呀伯爺婆 ... 姪孫結婚啦，我要幫佢打點一下。」
呢一個，係我咁耐以來聽過最動人感動o既一個謊話。
人生就好似變幻莫測o既天氣，雖然可以預料，但往往都出人意表 ....
老公公o既心臟日復日咁康復，係準備出院果日，竟突然惡化，撒手塵寰。
姪仔辦理完死亡證明之後就黎搵我，要求暫時唔好話比老婆婆知，
因為老公公死前遺言 : 「照顧伯爺婆... 唔好話佢知我o既事，
我唔想佢受剌激。」
呢個時候，無一個在場o既人唔感動唔流下眼淚，包括我 ...
當日我巡房o既時侯老婆婆又問 : 「D 果汁飲晒啦,點解伯爺公佢又唔見人? 」
護士強忍眼淚 : 「妳唔記得o左咩? 姪孫過兩日結婚啦 ! 老公公要幫手嘛。」
第二朝清早，我發覺老婆婆床頭多左樽瓶果汁，
聽到護士同老婆婆話 : 「老公公剛o黎過，佢見 妳訓得咁甜，唔捨得叫醒妳，
放低果汁就走o左啦。」
當護士一轉身發覺我企響度o既時候，立刻雙頰通紅...
我微微一笑，拍o左佢膊頭一下，慶幸佢有果顆愛心，不為歲月冷卻。
當日下晝，護士長察覺坐響梳發對住窗望風景o既老婆婆無o左呼吸，
我迅速跑去一手抱起老婆婆，再聯同護士將婆婆放上病床急救 ...
搶救二十分鐘之後，我宣布失敗 ...
我一邊寫報告記錄，一邊諗起「陪著你走」o既一句歌詞 : 「如果,
走到這世界邊端，我倆已是無力前行，跟我一起飛去... 」
護士長走過o黎同我講 :「估唔到妳咁大力，一手就可以抱起老婆婆。」
我只係報上微笑，因為我已經唔想講任何o野，我怕我忍唔住眼淚 ...
老婆婆的確好肥，但係好輕，因為佢o既靈魂已經跟老公公飛走o左啦...
"愛" 雖然只係一個字 ，但係無人亦都無o野可以具體咁解釋呢個字 ...
正如糖好甜，花好香 ... 根本無得解釋，要用心同親身體會先可以感受。
真正o既愛應該係堆藏響心裡面，去體會，去感受，去領悟 ...
即使天會變月會圓花會枯人會老 ...