今日晨早爬起身，同Keena去咗荃灣玄圓學院拜太歲，雖然今年我既生肖無犯或沖太歲，但為求心安，都決定去拜一拜，除咗祈求家宅平安之外，當然亦都為媽咪仲有老公求咗平安符。其實拜太歲的確是一件很煩鎖的工作，每一個步驟都要依足指引，好彩今日人唔算太多，所以都叫幾順利，見時間仲早，我哋就去咗《味千》食lunch，食咗蒜香牛筋烏冬，同埋一支勁巨型既芒果冰，然後我就要趕住去跳舞了。

每逢星期六的Ballet lesson都會很多人，但今日grade 4只有我,Susu,Wolf 還有Showdow。。Miss今日主力留意grade 5的同學，所以我哋做barre時，都可以輕鬆一啲，咁樣反而無咁易錯﹗其實黎到二月，做barre時，已經睇到自己既進步，我所指的進步係盡量將犯錯既可能性降低，哈哈。而今天做Centre時，Miss集中火力鬧grade 5，Miss仲嬲到話教到好灰心，一啲進步都無。。。見到Miss變咗暴龍，我哋當然唔敢做錯，所以做每一個動作，都迫自己要停一停諗一諗先。。今日Port de bras要斜角對鏡做，要少少時間適應下，做Assembles時，Miss仲讚我good添，呢小小既鼓勵，其實已為我打了一支強心針了。

跳完舞同Susu火速去了花園街食酸辣粉，辣魚蛋同埋燒賣，然後我就要趕去尖咀搵三月擺酒既資料，我去咗之前媽咪話唔錯既「金殿海景宴會廳」，上到去的確覺得不俗，樓底高，而且可以望到尖咀夜景，另外我又去咗東海同埋映月樓，其實三個地方都唔錯，最重要呢三個地方全部係我老豆揀既，所以佢一定唔會嘈囉﹗

搵完資料睇咗場地，跟住搭船去灣仔，然後坐叮叮過銅鑼灣Join老公，點知係無約既情況下，我哋喺電車站撞到，真係心有靈犀呀﹗我哋6:45要去JP睇「我愛香港‧開心萬歲」。。。自從做完專訪後，一直都好想去睇呢部戲，有志偉、君如呢兩個笑彈，預咗入場可以輕輕鬆鬆笑番餐。。。果然OK而且呢部戲仲加插咗好多香港情懷，雖然我無住過屋村，但係都可以感受到嗰種屋村文化。。。

睇完戲，我哋去咗《別府》食飯，估唔到裡面竟然見到好多龍貓掛牆畫，好鬼得意﹗我差啲以為自己去咗龍貓餐廳食飯添﹗叫咗碗麻辣腩肉拉麵，（零辣，失望，）滑旦豬扒飯、北寄貝壽司仲有我最愛既芝士春卷。。趁熱食唔錯，我同老公都係芝士怪。。。

食飽飽，又去咗麥記食雪糕，我哋仲用notebook睇番七年前我既BLOG，突然腦海浮現咗好多當年既片段，有好多唔係睇日記都幾乎忘記得一乾二淨，老公好多嘔心既留言，睇怕都係當年先寫得出呢﹗亦因為呢晚令我更有衝動寫番日記。。。。