奇怪
　　　　　　　天氣若一反寒
　　　　　　　就會想到伊
　　　　　　　
　　　　　　　明明
　　　　　　　伊的嘴唇蓋春風
　　　　　　　含笑的時陣
　　　　　　　有一種太平洋的氣味
　　　　　　　
　　　　　　　而且
　　　　　　　目睭微微的笑容又擱
　　　　　　　親像兩罐米魯了後的
　　　　　　　七月
　　　　　　　
　　　　　　　奇怪
　　　　　　　天氣若一反寒
　　　　　　　就會想到伊
　　　　　　　
　　　　　　　想到伊去嫁尪彼年
　　　　　　　連熱天都冷甲哭爸
　　　　　　　
　　　　　　　欲曝往事日頭無夠炎
　　　　　　　西施穿的又擱無夠涼
　　　　　　　連惦路口冤家的政治人物
　　　　　　　都攏青菜弄一下
　　　　　　　就隨人返去服務處
　　　　　　　泡茶
　　　　　　　
　　　　　　　原來是
　　　　　　　茶甲酒攏
　　　　　　　已經溫吞
　　　　　　　才會
　　　　　　　天氣一反寒
　　　　　　　就去想到伊
　　　　　　　
　　　　　　　想著伊彼個南部尪
　　　　　　　甘會知影
　　　　　　　天氣反寒的時陣
　　　　　　　伊就會聽　庭仔腳
　　　　　　　彼塊冷吱吱的ＣＤ