力寶寶農場紀事---第十一回

上回講到：
雪球因為被雪櫃困住左一整晚，變左一隻淨係識放臭屁既毛毛。被力力同埋寶寶帶左去獸醫果度之後情況已經好轉不少。

一個月後。

寶寶同埋力力係度諗緊送d咩野俾毛毛們做禮物。點解要送禮物俾毛毛呢？

毛毛百科全書裡面寫住：
『4月4日：人類既兒童節，對毛毛族人來講亦係佢地一個好重要既節人。佢地會係呢日圍埋一齊唱歌、跳舞慶祝加上請守護神上座儀式，以祈求來年一切安好。

＊請守護神上座儀式：毛毛長老會帶領一眾族人找來最軟、最安全的東西造成鳥巢型東西，並在前放上最上好的食物，吸引森林內最為食的守護神上座。及後，該守護神將於該年帶領一眾毛毛族人找尋食物。
毛毛族人非常敬重守護神，所以會有嚴密的看守措施。所以，直至截筆當日，作者仍然沒有見過守護神的真面目........』

「咁即係點喔？送d咩野俾佢地好呀？」肥肥張大口問~
瘦瘦隨即答道：「佢地話要軟野嘛，咪俾D軟毛巾佢地玩下囉。再唔係，買d糖仔佢地食囉。」
「係喎，反正我地依家養緊佢地，佢地都唔一定要搵守護神啦。」肥肥點頭說：「不過，你唔想知道佢地個守護神係咩樣既咩？」
瘦瘦想了一會，問：「如果係隻怪物或者熊人…我地咪死得好慘？」

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
係呢個時候，廳中傳來陣陣嘈雜聲……
綠毛：長老毛唔係度，我地今年唔洗跟咁足啦…
雪球：唔得架，無左守護神，我地好難搵到零食架！！
綠毛：俾你搵到守護神，佢都唔可以聞到薯片袋既味架啦！
紳士：係呀，佢地兩個成日都有野我地食。我地想食咩野都有咁滯，所以，搵唔搵守護神都算啦…..
斑馬係呢個時候行左埋去毛毛旁邊：幫手做家務啦，企係度傾偈…..

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
兒童節當日：

力寶寶農場大屋地下竟然有條蟻路。
行近d睇，竟然？！……………………
「標~~~~！」斑馬高音地說，(正常聲)：「邊個整到成地都係蜜糖呀？想掃死人咩？」
「咩呀？又咩事係度嘈嘈貢呀？」說著，綠毛懶洋洋地從廚房行到廳中心。
斑馬怒氣衝衝：「你地唔幫手做家務都算啦，仲偷食蜜糖，搞到成地都係糖漿！依家你睇下，幾多蟻係度！」
「唔關我事架，我都無食蜜糖，唔信你聞下！呵~」
「嘩！好臭呀！…食咩來呀你！」
「不如搵下d糖個源頭係邊度，咪知道係邊個搞到地下咁污糟囉！」

就係咁樣，佢地搵埋紳士一齊去。點解少緊隻既？因為…佢地搵佢唔到。不過，佢地三隻都相信整到地下咁污糟既，一定係唔見左果隻。
咁o岩當時紳士係大廳果度望住部plasma傻笑…所以就俾兩隻毛捉左來做偵探班一員啦。

紳士垂頭喪氣地邊行邊說：「真係當衰，睇睇下卡通片要幫手搵邊個偷食蜜糖…又無我份食=.=唉…」
佢地三隻野追蹤住果條蜜糖線一路行~見到條蟻路去左花園草叢度就消失左喇…
紳士有d唔情願咁講：「唔係要我入去搵下化…」
「喔？有咩問題喔？咁咪仲好，刺激D嘛。」常常半夜四圍冒險既綠毛輕描淡寫地說。
斑馬仍然怒氣衝衝地說：「我唔理，總之邊個搞鬼，我一定要查清楚！」

就係呢個時候…草叢裡面有個黑影閃過…草堆郁左一下…

（待續）
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
後記：

瘦瘦：「今集真係好耐無寫過架啦，不過，一早已經諗到守獸神係咩野樣架啦！」
肥肥：「得閒寫多Ｄ嘛，成日掛住打機。」
綠毛：「其實咁多期都係我寫架，不過，俾瘦瘦出個名之嘛。」
肥肥：「喔！係？咁下次俾我出個名好嗎？」
綠毛：「翻你個床頭打呵欠啦…」
肥肥：「超……..」