我 e 詩人兄哥1屑仔詩人e 氣質攏無。自細漢伊就愛讀詩、寫詩，伊講過去寫e 詩na 深，na 少人看有，na受人歡迎。m koh ，chim-a 伊無希罕啊，伊bah 用家己e 母語寫詩，m 管人看有抑看無，m管人按怎想，按怎看待伊。

我 e 詩人兄哥真趣味，kap 伊作伙去peh 山，聽著花仔和尚khok-khok- khok e 叫聲，伊煞學青笛仔e phin 仔聲鬥鬧熱。阮報伊看3隻生作真sui ti 仝位飛來飛去e 蝴蝶，伊講：「阿 m 是有人掖鹽，著是有人ti hia 放尿啦！若有糖尿病e 尿，擱會有狗蟻so5 來so5去」害阮笑kah 腹肚痛，伊擱若無代誌，歸路唱歌詩。

我 e 詩人兄哥真無趣味，讀大學e 時，ti 加油站作零工，開嘴合嘴「原則上」，得著1e 「原則上」e 外號。同學欣賞兄哥e 作人，看兄哥古意、善良，有理想有抱負，想beh ka 家己e 姊姊介紹hou 阮兄哥，我e 詩人兄哥攏無考慮著講：「好啊！先通批看mai」無外久，同學e 阿姊寫1張文情並茂e 批寄來，我e 寶貝詩人兄哥回批竟然ka 小姐講：「汝beh 參加高考，字siuN潦草，按呢be 使。」結局免講ma 知，同學e 阿姊氣phut-phut 講伊掠準伊是誰？同學看著我e詩人兄哥，干單笑笑haiN 頭，
正港是豬 8 戒照鏡，雙面m 是人。尾a ，當然準tu 煞。

我e詩人兄哥論真講起來kam 會凍算詩人，我ma m 知。成大畢業彼年，伊考條師大研究所，3年後完成1本厚厚厚e 聲韻研究論文。伊好意ka 無暝無日寫好e 論文提轉來，送阮1人1本，阮嘴是呵咾講：「真gau5， 寫了真好！」順手掀掀咧，隨tu 還伊，阮無講伊ma 知影阮攏看無，擱嫌鎮位。人笑講兄哥ka 碩士論文當作博士論文teh 寫，伊講「乾1杯！多謝我e 知音」教授叫伊擱讀博士，伊煞拒絕講：「已經有夠啊」m 知是阮1家人m bat 貨，hou 伊刺激siuN 大，抑是我e詩人兄哥體認著伊辛苦完成e 論文，日後干單剩冰ti 各大圖書館e 命運。

我e 詩人兄哥 bat ti 工場做工，bat 透早送報紙送養樂多，ma bat 去工地做土水，chim-a 伊ti 學校教冊兼寫詩，伊講體驗無仝e 生活，按呢才趣味。汝講我e 詩人兄哥是m 是真怪奇？