Tak擺去承天寺peh 山，攏會看著1koa 阿巴桑、阿ji桑 ti 山kha 賣菜，賣e 攏是in 家己e 菜園a 種e 菜，我總是會ka 腳步放慢，金金a 相看mai 有啥mih 菜，若有金瓜，我一定交關選買。

Kam 是我特別愛食金瓜？我想是因為金瓜bat 乎我美夢成真，乎我真正體會著豐收e 滋味。

雖罔 ti 庄kha 大漢e 我，有淡薄a 種作e 經驗，m-koh 阮m 是真正e作田人，阮ma無家己e田園。Ti 我4歲hit 年，阮阿爸著來過身去，放阮阿母1 e人kaN 4 e gin-a ，阿母e 目屎哭kah ta去，現實e 生活ma 愛面對，日時去幼稚園上班，beh 暗a 騎a 爸留落來e o-to-bai 四界去hoah 玲瓏、賣雜細。阿母無閒e 時，就ka 阮寄ti 春生阿伯 e kam-a 店，春生阿伯是阿爸e 叔伯a 兄，in 翁a 某攏真疼阮，定定提kam-a糖乎阮食，叫阮乖乖m thang吵。

阮 kap 阿爸e 親大兄in 1家人toa 作伙，一直到我10外歲a 分家伙。阿公留2坵田，阿爸kan-na 2兄弟，照理講1人1坵，a 伯卻ka 阮阿母品講「beh 愛田抑beh愛厝」2項選1項。

若選田，阮著愛搬走，1 e查某人chhoa 4 e gin-a， 無厝beh 搬去叨位？阿母免講ma選厝。就按呢阿伯in ti庄ni卡 oa大路邊買1塊地起大厝，了後阮免擱去田ni鬥腳手，收成ma全無阮e 份額。阿母愛阮好好讀冊，相信有1工會苦盡甘來。

阿姊一直ng 望有家己e 田園，ti 我小小e 心靈ma 有過chit 款願望。阮分著e 厝，kui -a 年後才知影厝地是kui- a 代人公家e ，也著是公--e ，登記有所有權人e 名，超過ku i-a 10 e ，阮阿伯無可能m知，這點一直kah 伊過身，阮阿姊攏無法度諒解。

阿姊 ti 台中讀冊、食頭路、結婚、生子、買厝，有家己e 田園soah 變作1 e 夢，1 e na 來na 遠e 夢。我儉腸neh 肚，加上厝e 人鬥相工，總算ti竹東買1間2樓半e 厝，環境清幽空氣好，暗時擱會凍聽著虫叫e 聲，tak 戶厝前攏有車位，厝後擱有1塊空地，厝邊隔壁大部分攏擱khi 出去，無toh 是作後花園。

我 toa 入去了後，利用hioh 睏日ka 空地e 石頭a 拾拾leh 、塗挖乎鬆，因為塗無夠肥，想來想去番薯葉a 命卡韌，著ka 種番薯葉a，番薯葉a生kah真sui，我chheng 在ti 下班後挽菜、khau 草，感覺真趣味。

有1工khau 草e 時，看著1欉m 知ui 叨位來e 瓜a 欉，看be 出來會是啥mih 瓜，我抱著好玄kap 趣味e 心情 ng望伊緊大欉。

1工過1工，瓜a欉na thoaN na 開，na 來na om ，伊無急beh 乎人知影伊 e 名字，無急beh 展現家己，只是tiam-tiam a 釘根、生thoaN，tiam-tiam a 開花、結籽。

每工下班，頭1項代誌著是去看瓜a 欉是m 是仝款青翠，食飽了坐ti 外口吹涼，欣賞瓜a 葉曼妙e 舞蹈，有時跳朗斯有時曼波，有時接頭接耳，親像teh 參詳tang 時a beh 乎我1 e驚喜。

故鄉滿園 e 西瓜欉ma bat 跳仝款 e 舞步ti 風中迎接我，hit e 遙遠 e 夢ti 我 e 生命中漸漸明朗起來。

看瓜a大欉，變作1chan 重要e代誌，充滿期待。

金瓜！是金瓜！開出1蕊1蕊大黃花e 時，我 ioh 是金瓜，正港乎我 ioh 著。1粒1粒金瓜生kah 滿滿是，黃--黃--黃 na 來na 大粒，有 lo 腳e 、有矮鼓e 、有圓滾滾e 腹肚、ma 有大大細細e 葫蘆，我有講be出來e 歡喜kap滿足。

Hit 1年，金瓜che kah 食be 去，分送親chiaN 朋友擱有剩，乎我練就金瓜大餐，金瓜糜、金瓜飯、金瓜鹵鹹、煮湯、the 炊…，擱會凍作派作點心，kan-na 精差無載去菜市a hoah 賣。

阮雖bong 無田，m-koh 天頂e 父透過金瓜欉，乎我圓1 e 作田人豐收e 美夢，乎我感受著天父對無父e 孤兒深深e 疼thang，我一直感恩長久以來，上帝乎阮che che e喜樂 kap平安。