歡喜婆a e哭聲， ti 2002 年11月，刊ti 海洋台灣電子報，原本我寫e時，是用漢字加有調號e 羅馬字，因為驚讀者看無，我全部改作漢字，因此產生1koa 怪奇e 漢字，ma 乎1部分be曉台語文，但是想beh學e人掠準愛按呢寫。

總是台文教育iau boe開始，所以用字各顯神通，但主要精神攏是：忠實紀錄台灣e 話。

台文教育真重要，愛趕緊進行，是tak 家e共識。

有人講tu 開始看無，m- koh ，kui e頭殼用台語思考，tau tau a 念，尾a toh 會發現文章e sui ，有人講hit 篇是真好e教材，擱講伊be曉台語，想beh學台語。

1 e 唐先生真熱情真古錐，寫1篇真長e文章回應，表達伊感動，伊講歡喜婆a 是in 序大人e 化身，伊真歡喜有人寫出來in e 遭遇，擱問我是m 是會凍「轉載」hit篇文章，伊beh copy乎台灣少年輩看。

遺憾e 是，有1e朋友質問我：「我是一名客家人，敢問我是否為台灣人???」
「 若是，我說的話應也是台語，這樣小小的尊重與要求你們為數眾多的holo long kan e sai phue hap??? 請慎用台語二字，你們的話可以叫做holo 話，台語是大家的，包括認同台灣的每個民族」

我真正m知影伊為啥mih hiah- ni 激動，我kam 有寫冒犯客家人e話？
伊siuN氣憤，所以看無我真正e意涵。

我真清楚講：「母語不單是媽媽e話，更加是釘根生thoaN ti這塊土地e語言kap文化」「愛這塊土地e語言文化，才是真正e台灣人」「咱作伙拍拚，建立語言平等、族群和諧e民主國家」

客語和原住民語共款攏是 "國語政策"下e受害者，應該ham咱作伙來復興母語，kam m是？

我請hit e客家朋友，m 通干那生氣，愛人尊重，家己ma 愛尊重別人，愛問家己為家己e母語做了啥mih努力。

文華兄講：早期，台語兩字沒有什麼爭議，自從“新黨”人士針對此做文章後，才有這樣的反應。甚至挖到最後還說：只有原住民才是台灣人。可見，是有心人士的挑撥。

想起來乎人真傷心！

作語言運動e 人攏知影，卡早台語就是指 holo 話，m-koh，chim- a，in 攏m 敢ka holo話稱呼作台語，in 驚傷害客家人e感情，ma 無願意乎原住民朋友艱苦，咱e苦心kam kan-na月娘知？？！