阿蘭師姐ka7我講：「in m7驚死，in掛意e5是有人愛in無。臨終e5時，你一定愛陪ti7伊e5身邊，伊會歡喜toa3 tioh8你e5愛來離開。」m7知按怎，我e5目屎soah親像拍開e5水道水流be7離。《深河》e5主角大津神父，跪teh祈禱，掀開聖經e5一頁：「伊看起來淒慘，人人看be7起伊、放sak伊，像遭受怨妒hong5棄嫌e5人，伊用手遮面，任人欺負，伊確實phainn7咱e5病痛，承擔咱e5悲傷」，伊講「神有各種形象……，神m7是人仰望e5對象，反倒轉來ti7咱人中間，ma7包括樹a2 kap花草」。Ti7受苦e5人身上，大津神父看tioh8耶穌，ti7動物植物內面看tioh8神。

  Grace脫離危險，大家攏誠歡喜。Gin2-a2逐工攏teh問：「狗tang時e7-tang3出院？」in主動捐出買si3-siu3-a2 e5錢，tau3 kheng5醫藥費，實在足感心e5。只是無人e7-tang3收留伊，其實gin2-a2攏真heng3，只是序大m7答應。我只好ka7chhoa7轉來厝，伊koh真虛，需要靜養。阮翁建議ka7 chhoa7轉去學校放，我無同意。伊ti7 hia hou7 環境淘汰一擺，我boe7-sai2目睭金金，看伊koh受傷害。

 
    考驗才tu2開始。頭一暗伊尚無放6 pu5尿，歸暝我攏揉土跤kap教伊ti7浴間a2放屎尿。天光，伊總算放對所在，阮一直ka7 o-lo2，伊歡喜kah脚手ng3天踢來踢去，腹肚現現，後來阮才知影he是完全臣服e5姿勢。放屎尿e5大代誌，總算解決a2。M7-koh後來發生一件代誌hou7阮當時誠生氣。Hit日，我買好beh hou7伊食e5、用e5、耍e5 物件，拍開門竟然看tioh8伊ti7膨椅頂耍拖a2鞋。我想無伊是an2怎peh過隔開e5板a2跳去膨椅。Kan-na7知影伊ka7家己活動e5範圍舞kah垃圾lilo。E7-tang3確定e5是伊e5身體完全好a2，精神飽tiN7、活力十足。我ka7土跤掃清氣，用報紙作棍a2，請伊食一頓粗飽，伊bih ti7浴間a2，親像作m7對hong5處罰e5 gin2-a2，表情驚惶koh無辜。尾a2我才明白，原因出ti7 hit日我嫌便所有尿味ka7噴香水。

 佳在，現代資訊發達，阮ti7短短e5時間內，了解che7che7關係狗e5智識。親像頭擺作人父母，驚有任何失覺察。阮希望伊自在、快樂、幸福。Grace這個名是阮號e5，意思是「恩典」kap「優雅」，hou7 伊toe3上帝姓「G」，因為上帝e5恩典kap 眾人e5愛心，伊才有重生e5機會，阮ma7期待伊作一個優雅e5淑女。

  M7-koh，知影kap做會到是二回事。他亂食、亂咬e5歹習慣就真oh改。屎內面有衞生紙、布、塑膠……，攏是伊犯罪e5證據。醫生講牙槽癢，不安、無聊，攏會亂咬。「潔牙骨」kap chhit-tho5 物 ma7攏chhoan5 a2，情形時好時歹。M7-koh若有人ti7厝，chia e5攏be7發生。逐擺阮beh出門，伊tioh8靜靜坐ti7壁角，用m7甘e5眼神接受阮離開e5事實，hou7阮真行be7開跤。逐工，阮攏e7-tang3感受伊e5信賴kap感恩。透早伊歡歡喜喜等阮起床，看伊ka7阮chhoan5 e5 物件食了了，親像山珍海味，我攏足感動e5。1開始，阮買素食e5乾糧飼伊，尾a2發現伊開始想beh食阮食e5 物件，番薯、馬鈴薯、金瓜、紅菜頭、青菜、水果……，伊逐項beh，甚至阮配茶e5土豆，伊ma7食kah嚇嚇叫。只要是阮食e5，伊攏認為是人間美味。伊愈來愈像阮tau e5查某kiaN2。