現此時中小學母語e5 教育，雖然ti7 學園起pong7 a2 ，m7 koh，國中e5 部分是選修，ti7 升學壓力，kap 各種不利e5 因素之下，形同虛sek ，覺醒著母語e5 重要，看著gin2-a2 開chhui3 合chhui3 攏是華語，kap in 講台語，有時a2 親像鴨聽雷，有時a2 得著e5 回應是：「mai3 講啦！有人聽無」雖然，幾若擺阮攏會講這寡觀念hou7 in 思考，而且提醒in 母語對咱e5 意義，總是效果真有限。

過去，1 禮拜有1節『聯課活動』，老師會tang3 伊家己e5 專長kap 趣味開課，我心肝底想講無利用chit 節來教母語beh 等tang 時。做好年度計畫，ui3 淺到深，訓練in 聽、講、讀e5 能力，煞落來著是寫台文e5 目標，我e5 內心充滿熱情kap 趣味。啥知，開學無joa7 久，學校集合全部有擔任『聯課活動』e5 老師，宣布chim2-a2 叫作「主題活動」，今年beh 來演戲，分『戲劇』kap『音樂劇』，學期中beh 作成果展。演戲？真好sng2 a2 ！m7koh ，我e5 年度計劃全去了了a2 ，放棄教母語e5 機會，我心肝底真m7 甘，ma7 真m7甘願。「誰驚誰，演著來演」來1齣自頭到尾e5 台語音樂劇，啥款？

說服全班同意演台語戲，是成功e5 第1步。總算ti7 我講kah chhui3 角全波、有chhui3 講kah 無瀾koh tah胸坎保證，包chhoa7 某koh 包生kiann2 e5 情形下，in 勉強tim3 頭講好。可能有人會講chit e5 老師真無路用，人—1句話著妥當a2 ，你愛講1tholakhuh ，是a2！ 是a2！我愛民主，討厭威權，m7 管我家己是khia7 e5 位是koan5 是低，雖然民主e5 方式chhoa7 班加真thiam2 。

第2步是選歌，因為goan2 beh 演e5 是音樂劇，我chhoe7 真che7 台語歌曲，有民謠、有gin2-a2 歌，ma7 叫in 分組去chhoe7適合e5 歌曲。尾a2 ，經過tak8 家表決，選定in chhoe7 e5 「向前行」，是林強演唱e5 歌曲。In hiam5台語老歌siuN 悲傷，hiam5 gin2-a2 歌siuN 幼稚，少年朋友愛聽e5 歌曲，節奏分明、旋律強烈，看來合少年家口味e5 台語歌現此時koh 真欠缺。

歌選好了後，頭大e5 問題chiah 開始，劇本leh ？解說歌詞hou7 in 聽，引chhoa7 in 想戲齣，in 想kah 頭殼giong7-beh piak 破，ma7 是干單hit 句「我beh 來去台北拍拚，聽人講啥物好康e5 攏ti7hia 」，佳在負責跳舞kap 道具製作hit 2組攏加減有淡薄a2 進展。經過2、3禮拜，寫劇本hit 組iah 是1粒頭2粒大，這e5 工程對in 來講真正無簡單，我真驚『揠苗助長』，顛倒害死gin2-a2 栽，ti7 in 開chhui3 講beh 放棄、講beh 換歌晉前，我連夜替in ka7 劇本寫出來。
劇本出來a2 ，真無簡單選出4個是班上e5 查甫gin2-a2 ，有1個hou7 同學選著m7 koh 伊無願意，伊講伊是美國人，koh lau3 英語hou7 我聽，我講就算你搬去美國，人ma7 be7 ka7 你當作阿 tok a2 。goan2 另外koh chhoe7 有意願e5 同學。

4個查甫gin2-a2 攏真認真背台詞，其中1個反串演查某gin2-a2 。真che7 個中晝，in 攏無睏，作伙練習。 Ti7 班上同學面頭前演出，tu2 開始in 攏真pi3-su2 ，真驚講m7 對去，事實上in ma7 有真che7 句話，無了解意思，聲調會teng5-tann5 去。Hou7 in 信心kap 鼓勵，1遍koh 1遍練習，了後in e5 表現愈來愈好。

演出hit 1工，上台e5 同學攏真緊張，m7koh講了真順，無落溝去，唯一可惜e5 是in無gia5 maikhuh，聲音siuN細，坐卡遠e5 聽be7 清楚，演煞了後，阮chiah 相信阮真正做到a2 ，精差無感動kah目屎流。