冇錯,我係鍾意斷背山,但而家已經5月,就算眼鏡有色都應該甩得7788啦...問心講,我真係覺得Crash絕對不如斷背山,而且兩片隔住至少3套戲o既距離(當然係其他3套最佳電影提名者),奧斯卡抵炳!

Crash最令人滿意係劇本(佢個剪接獎見仁見智,不過呢類穿插片似乎易d拎剪接獎)原創性高,佈局精奇,有底死機智亦又有具洞察力的對白,但劇本亦有缺點,好似電影大堆頭角色中有d破壞份子(對套戲),如Sandra Bullock同Brendan Fraser,佢地o既段落編排散亂(中段Sandra Bullock完全玩失蹤),砌翻埋其實又好普通,佢兩個的演出亦係全片最弱...呢條線全靠響其他幾個戲劇性同深度兼備的故事中左匿右匿先勉強過到骨,另外,劇本亦未免太巧合,中段的那場救人戲響澳門發生先講得通吧...對於一套講種族問題的電影黎講,呢類巧合來得太便利了

有人話Crash中的少年係對照麥迪倫,代表一種隱性的歧視者,算係一下奇筆,不過約60年前的奧斯卡最佳電影君子協定已有呢種角色,片尾甚至大膽指出沉默者才是造成種族歧視與社會不公的元兇,亦可見Crash探討的東西在奧斯卡史毫不新鮮

而作為奧斯卡最佳電影,Crash的導技偏向差勁,全套戲拍攝手法冇亮點(類似斷背山中jack的閃回或片尾空鏡之類令人記得的鏡頭),局部還顯得重覆累贅,慢動作玩幾次,關門過場又玩幾次,睇得出Paul Haggis想有d野但功力又未夠,難怪今屆金球獎整多左個最佳導演提名都唔預佢...幾場戲好似送隱形衫又拖長黎拍,電影更加有錯用配樂o既情況,好似中段Crash救人一場居然用上哀傷的配樂襯底,又用上過長時間,拍得毫不似有難,又點能夠患難見真情?

總括黎講,Crash響劇本上有一定成就,如果Paul Haggis搵到一個頂班導演拍呢套戲,至少唔會同斷背山差咁遠距離,至於電影其他部份真係冇咩可觀地方,Matt Dillon得到的讚譽也屬鼓勵性質為主吧,至少佢唔會做得好過Terrence Howard...有人話Crash係史上最差的奧斯卡最佳電影,我絕對唔認同,我都睇過一d比Crash差的最佳電影,可惜佢地都唔係今年o既出品