2008-03-28 22:46:50林姍姍
戰利品
我又出動左啦！今次我又o係荃灣買左兩對鞋，其中一對係 jelly beans！另一對係我鍾意某個 jelly beans o既款，同呢對差唔多樣，咁我就買左！
我仲買左對雞鞋！呢對雞鞋得返超細o既碼，做特價，o岩晒我！
除左置裝外，我又買左一大堆烹飪書，學整多幾味俾小菇食。
另外，o係米國買中文書好鬼貴，所以我今次返黎都要運好多好多書過去。《追風箏的孩子》的作者出左新書，名為《燦爛千陽》，希望會好似《追》咁好睇；自從睇左《最後的貴族》後，就愛上左以文革為題材o既書，《我和章含之離婚前後》又係另一個文革故事；張大春永遠係我的至愛；至於《解讀失眠》，認識我的人都知道，我以前成日訓唔著覺的，所以都好喜歡睇呢類書；《解密百年香港》好有趣，用好短的篇幅，講好多香港的歷史片段。
當我在書店打書釘看《解密百年香港》的時候︰
我說︰「你睇，連銀行擠提都有講，我都好記得銀行擠提呢單野，真係好多人去排隊。」
積奇蓮說︰「我記得有一年，聖安娜都有擠提。」
我說︰「我都記得呀，有人真係一次過拎左十幾盒餅。」
積奇蓮說︰「喂，你睇下呢本書有冇記聖安娜擠提件事。」
雖然我覺得聖安娜擠提一事頗為攪笑，但我認為呢本書極有機會記錄左呢件事，我說︰「好，等我搵一搵。」
結果係，《解密百年香港》並無記載聖安娜擠提一事。
潘師奶，返黎借D烹飪書黎偷師! 我已經山窮水盡，唔知仲可以出咩新招!!!
另外撘訕...我估係因為灰色果對平底，另一對高"爭"....係唔係? hahaha
版主回應
我煮左兩個半月就山窮水盡啦！好！到時你睇下o的烹飪書，睇下有咩啟發！
2008-04-03 17:09:51
睇黎今次香港之行, 幾豐收喎!!!
點解灰色果對鞋睇落大對d咁既??
你係咪淨係拎左empty suitcase去裝你d戰利品呢?! 嘩~好多書喎!! 我之前都買左幾本烹飪書, 但而家好多時都係想整咩, 就上網搵online recipe仲方便!!
版主回應
係呀，我著開 5 號鞋，當個 sales 拎呢對 5 號出黎o既時候，我都同佢講︰「我著 5 號喎！」其實佢個鞋頭好尖，放唔到腳趾的，所以得個長字。
係呀，online 搵 recipe 好方便！但都要諗到食乜先得！真係要揭下書睇下先諗到！ 2008-04-03 17:08:17
純粹補充:係我講完聖安娜擠提,我們仲係三聯爆笑tim!