六個階磚

　近日出席了明愛一個關於貧窮的活動，有中學生在台上分享探訪土瓜灣十三街天台屋住戶的感受，月租二千五，不過對面翔龍灣租緊二萬五……很諷刺嗎？另一位同學就分享佢去油麻地寮屋的感受，佢話探訪的一家三口住一間得六個階磚咁大的房面，床、廁所、廚房都晒入面，仲細過佢屋企個廁所，很誇張嗎？

　其實聽呢班小朋友的分享很感動，因為竟然有一班年輕人會想去知道究竟咩係貧窮。我相信我同睇緊報紙的你一定唔會係窮人，起碼你仲有錢買報紙。

　因為佢的分享亦令我回家後停了下來，細想一下。

　因為我細個屋企都好窮，住板間房，雖然係冇咩物質的享受，不過這是我過得最開心的日子……好老套，不過是真心的。一個腸仔包，已經可以令人覺得好幸福，而家？呢個年代的人會覺得食咩先幸福呢？一件家姐過的舊衫，終於都大個到，已經可以令人覺得好開心，而家？呢個年代的人會覺得咩先開心呢？

　我相信每個人都需要經歷貧窮才會有自己的天空。

　陳刀‧時裝設計師

From 5/9/07 東方日報