對於早前有傳張茜和拍拖多年的張衛健，因逼婚不遂而分手，心情勁靚的張茜即時作出否認，並風騷地獻出香吻，自爆隨時下嫁健仔，對於健仔公開指她是生命中至愛的女人，她甜到漏說：「我認為絕對係嘅！」

拍攝了兩個月，終於在日前煞科的新劇《歡樂桑田》，主角張茜和郭晉安日前在廣州舉行記者會。因水土不服消瘦了不少的張茜，對於與男友張衛健傳分手，事件沒有令她受到傷害，並否認情變。

二人拍拖多年，張茜表示從未向男友逼婚：「唔知寫報導嘅人瞭解我幾多，我哋都有通電話傾過件事，不過冇為呢件事勞氣。」雖然張茜已準備隨時結婚，但仍以工作為重，她說：「我隨時都結得，不過要問阿媽先，（阿媽對健仔有乜嘢評語？）媽咪話佢嘅戲好好睇，（你想唔想佢求婚？）暫時唔好求住，等我做多幾部戲女主角先，因為結婚需要投入，要諗得好清楚。」

至於健仔早前公開表示視張茜為生命中最愛的女人，她笑得更甜地說：「咁支持我呀！我認為絕對喺嘅！（你有乜承諾同佢講？）我唔識講呢啲嘢，一切盡在不言中。（佢有乜嘢優點？）佢心哋好好，（好多人都做到啦！）咁你係咪姓張先？佢唔會逼我做家庭主婦嘅！」有傳健仔曾欠債三千萬，但已瞞女友還清債務，她說：「如果還唔曬，我會搏命做嘢幫佢一齊還，不過呢件事真係唔清楚。」

郭晉安計畫置業安居

至於郭晉安則表示拍劇從未試過如此舒服，因為每日有八小時充足睡眠時間，他說：「我呢兩個月過得好正常，日日食雞蛋同飲鮮奶，好健康。」他正考慮置業安居，問他的理想家居要怎樣，他說：「愈大愈好，﹙系咪諗住結婚？﹚唔買樓都可以結婚，開心咪得囉！」至於明年是否再拍《阿旺傳》，他說：「我要問清楚先，呢樣嘢可大可小，我未知實際情形，因為大家好期待阿旺呢個人物出現。」