而家回想起我老婆俾人隊屁股當日。。。不知不覺已經過o左成個月。我都係上個禮拜先見番我個老婆﹐佢以最靚靚o既姿態出現。凹凸不平o既屁股已經變得又圓又“滑滑”﹐摸上去o既觸感同以前差不多。坐上車廂裡面﹐感覺分別不大﹐只係多o左D焗漆o既味。呢隻焗漆味認真難頂﹐有D人好鐘意呢種味﹐佢地話似新車味。不過對我o黎講﹐新車味同焗漆味一樣咁惡頂﹐D味令到車廂好焗﹐仲好臭添。

六月十二號﹐係我被撞o既日子﹐o個朝我o岩o岩去完ICBC(BC省汽車保險公司)。原因係我再上個禮拜五(即六月六)先o岩o岩被人o係停車場撞花部車。最好笑o既係對方想泊位﹐點知入位o既角度唔o岩﹐但係佢自己又懶得退後入返個好o既角度。咁o岩我當時坐o係車入邊等人﹐佢見到我響部車入邊﹐竟然叫我駛開D俾位佢。呢個七八十歲o既阿伯認真惡﹐不過我無理佢﹐繼續欣賞佢泊位﹐點知佢都係無退後。雖然我經驗同年資都未必夠呢位阿伯好﹐不過我眼力同技術肯定好過佢。第一我唔會好似佢咁泊車﹐第二角度唔o岩我絕對唔會叫隔離部車就我﹐第三我更加唔會繼續用錯o既角度泊車(特別係隔離車o既車主仲響車上)。我好心“呠”佢﹐提醒佢就撞﹐再講我根本唔想我老婆有咩損傷。點知個老頑固一意孤行﹐結果就high o左我部車﹐我落車叫佢退後。不過佢唔知真係唔識開車定唔識聽我講o野﹐竟然夠膽死仲繼續慢慢慢慢行前。不過佢最後都係要退後泊返好個位。只不過我可憐o既老婆就咁被人毀容﹐佢落車仲夠膽問我仲乜唔駛開D俾位佢。我反問假如我唔響車上﹐佢係咪等我返o黎俾位佢。佢答“唔係﹐不過如果我o係車上就應該駛開俾佢。”雖然駕駛技術係我高過佢﹐不過論卑鄙同口才我真係拍馬都跟唔上呢位阿伯。佢認真高招﹐當我地去check車o既時候﹐佢第一時候卒我部車﹐佢話無事。不過盲o既都睇成大條花痕﹐可能佢都覺得自己太離普﹐所以都即刻改口話係我之前已經花o左。我見佢死唔認錯﹐我都費事同佢繼續講﹐諗住問佢拿張燕梳紙抄低D資料。點知佢唔係一般o既野蠻﹐佢連燕梳紙都唔肯交出o黎。我都費事同佢嘈﹐抄低佢o既車牌自己報ICBC等ICBC D人同佢傾。不過好可惜﹐ICBC並唔係一間正義o既“奸商”。雖然佢地一直都標榜住奸商o既名﹐不過我本來以為佢地會幫我討返個公道﹐點知。。。唉~~~~呢個世界無天理。ICBC o既所謂專家話我部車D花痕唔似車同車做成。因為佢地見到o既痕跡已經係六日之後o既痕跡﹐而且佢部車開下停下﹐所以令到D花痕唔係一條過。佢地就係因為花痕唔係一條過﹐就話我D花痕唔係個阿伯做o既。雖然我有證人﹐不過佢都幫唔到我。

六月十二號當日我心情非常DOWN﹐仲同我朋友講﹕“七年啦﹐有車牌七年﹐第一次撞車係人地錯。但係ICBC竟然姑息養奸﹐我錯過o左今次o既機會都唔知幾時先再會有人撞我。”所以話我Ken Chan係烏鴉口﹐真係無錯。好o既唔中﹐衰o既鋪鋪中。所以唔好同我一齊落賭場﹐同我一齊落賭場都唔好同我一齊賭﹐哈哈哈哈哈。唔信邪o既可以隨時challenge o下黑仔Ken o既實力。講返十二號撞車o既情況先﹐當時我從Marine Dr. 西往東行﹐上knight橋。我仲記得當時我o係Marine Dr.上Knight橋 o既時候﹐等上Knight橋o既車龍長過姚明o既身高(即係唔係好長)。不過基于唔駛等o既理由﹐我就打算飛快咁去到車龍頭度打尖。不過車龍無任何動靜﹐我又唔想打燈等人讓我(打尖o既最高境界係---求人不如求己)。所以我就再進一步打尖﹐去到燈口位轉右。基本上﹐o個個燈口係唔可以轉右﹐因為o個個燈口係俾對頭車轉左上Knight橋。不過。。。無警察見到﹐就唔係犯法啦﹐哈哈哈哈哈哈哈。因為打尖o既關係﹐我比原定o既時間快o左大概十分鐘上到Knight橋。一上到Knight橋我憑我驚人o既cut lane技術cut到最左線(因為通常左線最少車)。不過Knight橋有個特點﹐就係每當繁忙時間﹐橋上o既中段都會出現complete stop o既情況。Knight橋另一個特點係。。。平均每日都有車禍。當時我見前面部車停得好急﹐而我當時o既車速都唔算太快﹐所以都停得都尚算舒服。我有一個習慣﹐就係每當殺車o既時候都會望下後面部車﹐尤其係我殺得急o既時候。今次我從倒後鏡中睇到o既﹐竟然係我夢寐以求﹐期待已久o既畫面。倒後鏡中﹐我見到一部來勢凶凶o既pick-up﹐佢以極高速衝緊埋o黎。我一直望住倒後鏡﹐所以已經做好被撞o既心理準備﹐而且我想閃﹐前面都無位。佢唯一o既希望係右邊線﹐因為右邊線o既車開得比較慢﹐所以仲未開到complete stop o既位置。我當時想去右邊線﹐俾多少少位後面部車﹐不過我見佢打右燈﹐我轉線o既速度未必會快過佢。而且佢有位轉線﹐所以我就按兵不動。對方當時o既判斷係非常之咁正確﹐右線係唯一避免意外o既方法﹐只可惜﹐佢竟然俾油去轉線。佢本來o既角度可能係無問題﹐只不過佢當時係唔應該加速﹐如果佢減速o既話﹐就可以避免一場意外。就係咁佢就撞o左我老婆o既右邊屁股﹐成個尾bumper同右邊o既死氣喉都爛哂。

話時話﹐撞我o個個黑人真係應該多謝我﹐如果唔係我一早睇到佢會撞我。我就唔會踩死brake﹐而我部車就會順勢撞埋前面部車。佢要賠o既錢就會。。。嘿嘿嘿~~~
不過今次意外最令我想唔通o既係前面部車﹐因為意外之後﹐佢竟然無第一時間離開。佢仲同我地一齊駛埋一邊﹐我當時好驚奇咁問佢﹐我係咪撞到你呀﹖因為基本上我係好肯定我無撞到佢。原來呢個白人後生仔係想俾個電話我話可以做證人﹐當時我第一個反應係感激﹐之後發覺原來佢同我一樣咁鐘意望後鏡。
車禍後﹐我停o左係路邊等拖車﹐期間有D小人打開窗用F word鬧我。我好想同佢講﹐而家塞車並唔係我o既錯。第一我係被撞﹐就算塞車係關我地單車禍事﹐都唔可以入我數。第二﹐Knight橋日日都係咁塞o架啦﹐唔想塞車就行第二條路啦。而且我地未撞之前都係塞車﹐所以實在唔怪得我地。