睇到香港巴士從屯門公路跌下o既新聞﹐我真係覺得心寒。可能係感同身受啦﹐我早兩個禮拜先炒完車。雖然兩單o野不能相提並論﹐不過我真係好替車上乘客難過。當睇到記者同救護員到達現場o既情況。血淋淋的現場活現眼前﹐雖然只係想象﹐不過血肉橫飛﹐屍體的殘骸掛在樹上﹐一滴滴血由樹上滴下﹐細膽D都死。一個人o既過失﹐導致廿幾個人喪生﹐加埋重傷o既人﹐佢打一世齋都唔掂。雖然佢未必係有心﹐不過恐怕佢都難逃自己良心o既責備﹐一個人最難過莫過于自己都討厭自己。

意外發生之後﹐貨車司機當然係第一個被問責。但建造防撞欄o既工程師都被問責﹐到底防撞欄是否過低或是否合乎安全標準。跟住都未討論完安全標準﹐就被工程師反彈到司機身上﹐佢話“安全標準都難保自殺式o既撞擊。”一未只係識推卸責任﹐雖然我未做到唔推卸責任﹐不過只要係我錯﹐我都一定會認。唔係我錯﹐我當然會推卸責任啦。

不過呢次意外﹐讓我真真正正體會到人間溫暖﹐香港人互助互愛o既精神。仿彿香港人o個種只為利益o既心態無哂。不過。。。自從董生上台後﹐香港真係黑過墨豆﹐金融風暴﹐911﹐SARS。。。ETC. 真係鑊鑊新鮮鑊鑊甘。董生﹐我唔係話你無能﹐不過你既然咁黑仔﹐點解你唔留o係屋企自己黑死佢﹐唔好連累我地香港人呀。