十月二十二日
今日係重陽，亦係幫阿水預祝生日的日子，其實佢廿四號先係正日。今朝神咁早就開始行動，第一站係去元朗唱K，約左十點，但係個個都遲哂到，我係其中一份子。我地唱到十二點半，唱左唔係好多歌，唱得唔係咁盡興，假期唱K真係唔抵......但係找數果時聽到個好消息，就係阿水請客!!!!嘩~~!!呢個簡直係天大o既喜訊，佢近排真係豪左好多，阿水好少咁好死，唔通佢患左絕症?!?!我同家明都係咁諗....哈哈......
下一站就係去西九龍踩冰，記得我上一次踩冰已經係好耐好耐之前o既事喇，大約五年前喇，咁耐冇踩，我都好驚今次仆到腰斷，但係好彩，我仲記得點平衡，可以慢慢咁行，熟左之後就可以踩快D，仲同吳芯周圍踩，不過果度都有幾個勁人，成日滿場飛，好幾次差D俾佢地撞跌，好彩最後都避開左，可以保持我不跌之身。家明原本同阿水沿邊咁行，但家明學得好快，唔駛一粒鐘就可以放手咁踩，超勁!!!而阿水就差D喇，佢玩左一陣就去食野，之後又話累，踩得唔係好多，而且佢又勁淆底，唔肯放手，所以就學極都冇乜進步，我地玩到五點幾就走喇，之後o係西九龍行左陣，原本諗住食埋晚飯先走，但係吳芯約左條仔，阿水又約左佢老豆，所以我地就各自歸家喇!!!返去之前，我同家明行左一陣黃金，冇收獲。
今日原本阿水帶返件褸俾有錢人，但係點知有錢人冇黎，還唔到俾佢，仲差D留左o係冰場添!!!搵返之後就落入左我手，哈哈哈，等我借黎著下先!!!