十月十七日
今日俾我電話嘈醒，原來今晚要返工，唔記得左添!!!食完晏之後就諗住做下功課，但係提唔起勁，結果又係變左玩電腦，跟住玩到咁上下就開始執野返工。
我帶左阿水借俾我本書上車睇，消磨下時間，睇左少半，就要落車喇。換好衫，就開始做野，今日好似唔多如意咁，又有激氣野，唉.....勁煩!!!不過今日有件奇怪野發生，話說有一個同我差唔多年紀o既女食客，都ok靚女，佢無啦啦叫我埋去，我初時以為佢要D乜，但係原來佢係問我：「我係咪見過你架？你好熟口面。」好一句只會出現o係電視劇o既對白，我當時唔知俾咩反應，只係答左：「係咩？」跟住就走返出去。哈!!究竟我有冇見過佢呢？定係佢high大左認錯人呢，呢D事情好少發生o係我身上，今次係一個奇景，以後冇乜機會再發生，早知我打蛇隨棍上，問埋佢叫咩名啦，唉......蠢左!!
返到去，就開始做功課，順便完成埋阿水本書，搞到成晚都冇訓過咁滯，本書都幾好睇，有D感動，裡面有D野寫得幾好，幾岩。