一切由受難竹起！

０２／０４／２００４
唔記得係咩情況下興起話想睇受難竹，講兩講就變成不如今晚去睇啦！
原本我、顏伊琪及ｃｈｒｉｓｔｙ三個一齊去睇戲，但由於ｃｈｒｉｓｔｙ約左人，所以最終得我同顏入場睇耶穌！有見ｃｈｒｉｓｔｙ未夠鐘赴會，我地三個一齊去左荃廣維苑食野，第一次同佢地兩個咁吹水，感覺．．．！
睇完戲後同顏一齊行去搭車時見到有人好似想跳橋咁，問的人係度影乜，佢竟然答我『我都唔知，聽日睇報紙可能會知！』人云亦云！
成晚最深印象莫過於每當有過份殘忍血腥場面時顏既反應！

某日+０５／０４／２００４
放工諗住搵方麗嫦飲野，點知飲唔成同佢去左觀塘唱ｋ。由於唱得太歡欣及飲左洒唔願走，係咁同方講價，由兩點幾講到４點先捨得走。由於太攰，第二朝請左半天假黎訓覺，爽！
訓醒打比方麗嫦，傾兩傾大家話不如踏單車，就係咁我倆係將軍澳租單車踏！
因為踏兩踏見到遠處有人放風箏，兩條茂利有樣學樣買風箏放，玩兩玩見到有人釣魚，兩條茂利又去左買魚排同麵包學人釣。最終乜到釣唔到，但第一次放晒成個線碌既線，魷魚飄到好遠好遠。大家係咁同魷魚講拜拜時先發覺夠晒鐘交車，兩個踏到喪晒咁返新都城還車！之後去左食台灣牛肉麵！
原來方都係傻，所以先會同我癲！


四月某一天
係ｃｈｒｉｓｔｙ同顏伊琪既遊說下今日終於踏足元朗！
放工時ｃｈｒｉｓｔｙ話不如入元朗食野啦，佢所講既好處包括：好多野食、有車直接返青衣、由公司去元朗好鬼快．．．
架巴士過完大欖隧道有感好似去郊區旅行咁，但真係好快就到達元朗！
我地約左已返家既顏係點心皇等，顏臨黎前已多番聲明佢會戴有框眼鏡黎著我地唔好笑！但由於佢咁講，佢黎到大家就會更加望佢戴眼鏡個樣，我同ｃｈｒｉｓｔｙ由見到佢第一眼已細細聲不斷講『ｘｘ，戴眼鏡個樣好搞笑／得意』！
自此，我地久唔久就會去下點心皇！

又四月某一天
放工同顏伊琪及ｃｈｒｉｓｔｙ往天水圍（新嘗試）食五十嵐，食完去左附近既公園吹水（佢倆係咁話我掛住傾電話）！由於太多蚊無啦啦去左ｃｈｒｉｓｔｙ家傾，順便睇相！更無啦啦第一次明天一齊返工，哈哈！
特別鳴謝ｊａｙ提供既物品！

２７／０４／２００４
同顏伊琪、ｃｈｒｉｓｔｙ及ｊａｙ－
嘉湖銀座邊睇人溜冰邊食上海野，完膳後睇救命！