除左我自己生日既一月之外﹐八月都算係我識既人之中最多人生日既一個月喇。今日至係二號之嘛﹐已經同Suwen慶祝喇。照樣係近排好興既四人行﹐即是Suwen﹑Elaine﹑阿熙同埋我。今晚去左機場附近既Benihana食鐵板燒(有條友晌我地面前玩晒雜技果種)。食完飯就去左Elaine舖頭切蛋糕。睇到個題目﹐相信大家都估到個蛋糕就係我整既獨沽一味芝士蛋糕喇。個蛋糕係我尋晚放左工漏夜整既﹐時間緊迫兼且個火猛左少少﹐所以無論外觀同內涵都唔係平時既水準。難得佢地幾個仲讚我﹐阿熙同Elaine仲話個兩個禮拜生日都要一人一個(都話八月多人生日架啦)。

另外有個好消息。就係明明上個禮拜返學校問﹐話我既畢業申請未有貢快批核﹐但係居然早兩日收到封信話我既申請已經批左。真係吹啤。點都好啦﹐可以放下心頭大石。