13-8-04

今日約左孫銘禧同jackie
我都估到孫銘禧送咩種類既野俾我架la...
bingo ~_~! 助助瘦身茶!!!
多謝哂la~每年生日都要remind我...

今日係八達通燃燒日
我地去搭西鐵~~我第一次搭咋!!
我好似未去過亦完全對香港既呢區係零認識

搭到去總站屯門
然後落車搭輕鐵去元朗
我地問帶路既孫生:點解頭先西鐵唔o係元朗度落既?
孫生話佢想搭輕鐵
哦~都好既~
知不過呀孫生老點我地早左三四個站落車
就對住我講行多d好...-_-
而潺仔森一路都話好攰...後生細仔o丫~(本人只係引述孫銘禧既說話而已)

輕鐵d路都好複雜路線又多
八達通係o係站o個度嘟~上車前嘟,落左車再嘟
我地見唔到d人嘟既?
孫銘禧話佢地d人係快閃手咁嘟左睇唔到架喎~吓??!
死人jackie勁笑我o係輕鐵企唔穩...
而呢度都好似未開發咁~幾唔城市吓
成日"目及"女既孫銘禧話呢度d女"梁"d喎

行到去好出名既元朗恆香買老婆餅
我忍唔住即刻食一個~仲熱辣辣好好味!!!

跟住佢地話出番去旺角食飯
嘩...勁嘥~山長水遠黎到連B仔涼粉都冇食...
...就去左旺角食寧記~
打邊爐又係勁食囉~