前幾個星期，客戶要求改料，要將全部部品再報價，再加上要做其他麻煩客戶的報價，睇怕一星期都未必做得晒，結果如我所料，晚晚OT都做唔晒，上星期尾，打算OT到零晨二點，不過做到十點左右，已經覺得空氣稀薄（冇冷氣），意志力下降，氣力不繼，又冇其他人，厠所只亮著兩盞燈，四周黑漆漆的，害得我忍著回家*~*，捱到差不多十一點就走，鎖完門後才記起還未打咭，結果又要開鎖，打咭，再鎖門。

唔認老都唔得，幾年前日日係咁捱，第二朝晨咁早返到公司都得！依家，根本頂唔到幾多日，分分鐘會病埋tim，最敝就係會變得又殘又老！仲邊有人要！

最衰都係亞頭，佢又話會幫手，又叫我專心做這間客戶就可以，其他由佢做。雖然佢攞晒其他客戶既野，但就一份都無做過，淨係放左佢張枱上，最後d Sales佬咪又係追我！兜左成個圈，都係我做返晒！老實講，佢係亞頭，唔幫我都好合理，不過我唔鍾意佢講一套做一套囉，懶偉大咁主動話幫我！