今日放咗工之後,
好攰....
真係好攰....
好唔容易去到個巴士站度,
出奇地冇乜人...
但係唔知點解, 今日唔係好想搭巴士番屋企.....

阿THY唔想搭巴士??
太陽從西邊升上嚟啊~~~~

無錯, 今日真係唔係咁想搭巴士,
想搭....我一向都唔係好搭嘅,,,”紅色小巴”

係唔想等?係想快啲返到屋企?....定係....

拖住疲累嘅身軀, 一口氣行咗過去搭van仔....
由巴士站行過去van仔站,
路程好短,
但係原來要背負住咁沉重嘅身軀,
一厘米都會等於一米....

上到VAN仔, 胡亂地尋找個位置,(都冇理到坐我隔離嗰個係邊個...)
呆坐咗一陣...
開車啦....

一直以嚟, 我都認為紅van係開得好快嘅,
但係架車上到加士居道天橋....
見到車速顯示器上面寫-----60km/h-----

吓???我即刻望一望個司機....
嗰一刻, 我呆住了。

我見到佢, 個感覺好怪....
唔係佢特別靚仔, 亦唔係佢特別樣衰,
冇乜頭髮仲地中海,兼夾帶住老花眼鏡嘅佢,
個樣普通到, 周街都搵到嗰啲..
有別於其他司機嘅, 佢只不過係維持佢一貫”安全速度”去駕駛啫!
望到佢, 個感覺有說不出嘅奇妙...
奇妙到....我覺得, 我好似係識佢咁.....

小巴的確係小巴, 慢極都總有個譜....
話咁快, 我就去到淘大啦...
呢個時候, 司機問:”街市有冇落?”

”街市有冇落?”
咁簡單嘅一句說話,
卻有一種親切感。

有人落車啦,
司機當然要收錢啦,
佢拎轉面, 我見到佢個樣啦!!!

原來,
我係唔識佢架....

但係,我終於知道,
點解佢咁普通,
但係會俾我一種親切嘅感覺。

佢好似我一位已故嘅親友,
呢位親友, 又係揸小巴架...
我以前去親淘大, 都會搭佢架車,
佢同呢個司機好似樣,
同是地中海,
同是架著一副老花眼鏡,
同樣揸得唔快,
同樣地, 都會問:
”街市有冇落?”.....

已經唔可以再搭到佢揸嘅車啦,
細個嗰陣, 家姐教我,
如果返屋企嗰陣, 見到佢揸嗰架車喺度等客,
就唔好行埋去搭,

點解??因為尷尬囉...
點解會尷尬?
因為我上得佢架車, 佢一定唔駛我俾錢嘅,
為咗避免尷尬嘅情況發生,
離遠見到佢架車喺度等客,
我同家姐一定轉軚,
搭巴士返屋企。

而家, 想有呢種尷尬嗁情況出現,
都冇可能啦...
回想起來, 舊年, 好似又係呢段時間,
就係佢唔係度嘅日子啦....
有嗰陣時, 又唔去珍惜,
到到冇咗嗰陣時, 又走去可惜.....


其實,
間唔中搭吓小巴,
都幾好啊...