冬菇晚晚直落蒲天光
冬菇，正一同個冬菇似到十足，頭似冬菇就算喇，呢啲外在因素，係可以「暢主（change）」嘅。但係，佢真係成個冬菇咁款，擺喺度嘢都唔見佢講句。有人曾經見過佢由朝到晏就得一句，重係句：「啊。」
講返啲過人之處，冬菇好似冬菇咁中意夜晚先來活動生長。有次Ling見到冬菇成隻熊貓咁，就問嗰晚喺度做乜。
「我晚上一般七點就瞓喇。」
「啊……咁早？！你都搞成咁嘅！！！」Ling詫異道。
「不過我十二點又起身……去玩「憨奶（online）」game，之後呢，一、兩點嗰陣我就去睇鬼片，三、四點嘅時候就去做作業喇。」
Ling冇嘢好講。
又有次，要影印一啲嘢，冬菇話佢姑姑喺學校教書嘅，喺嗰度有影印機，佢諗住去影印。
「咁你幾時去啊？」Ling問。
「要趁冇人嘅時候去。」冬菇話。
「幾時先至冇人啊？」
「夜晚乜冇人囉~」
「點解好似要去做賊咁嘅？」Ling諗唔明，唔通冬菇真係中意夜間先活動？莫非佢係夜遊神？定家族病史係「蝙蝠俠症」呢？