虹姐心目中嘅斯文人係邊個，不言而喻啦，點知重有更驚嚇嘅情節發生……
某日上吓上吓堂，阿君笑騎騎咁嗌神棍轉過頭去望啊大班，咁神棍咪照說話轉過頭囉，之不過淨係見到，大班十分頹廢個樣，用只手撐住塊面，重以為咁個樣可以令阿君笑成咁。咁神棍咪話其實都冇乜嘢啊，好正常啫。點知阿君再叫神棍去睇吓大班隔籬嗰個。神棍睇完乜都明瞭，笑都頂唔順，即刻敲落打鼓咁通知街坊街裏，重問大只羊攞咗部手機，遞去俾小肥偷拍。
喺落課嘅期間，壹仔就話啦：「哇，大班超爽！竟然同虹姐坐喎！」
咁神棍就問Survey，係唔係Survey特登整蠱大班啦，點知從Survey口中得到驚人嘅真相！「邊係我做咖，係啊虹姐自己走過嚟問我可唔可以換位，咁我梗係話可以啦，唔同俾檸檬佢食啊？！」Survey笑住講。
神棍口多多走去問虹姐，同大班坐大班有冇咩反應啊？虹姐毫不掩飾咁話：「佢咪同我講：「唔好咁啦！」之後成節課唉唉聲囉。咁人哋睇唔到啊嘛，坐前啲都好應該啫。」
話口未完，第二日事件重演，有係主動嘅形式提出要求同大班坐，虹姐開到口，係人都俾幾分面俾虹姐啦，係唔係咁話先？一節課終於完咗，搞到大班嗰堂都唔知聽得鬼打咁仔細，之後虹姐重好似坐上癮咁話：「不如下節課繼續囉！」
課間嘅時候，神棍同笑笑就喺度睇啲星座本月運情，講到虹姐嗰座嘅時候，兩個人勁笑起身，因為上面話虹姐呢個月會食到靚仔嘅豆腐，而之後個靚仔就會彈到冇雷公咁遠。神棍睇完咪即刻轉個頭嚟告知大班一聲，叫佢小心啲，因住俾某啲人食豆腐，大班重唔信，話今日都二月尾啦，廿八了都。唔知係有咁啱得咁橋啊，定抑或係神棍把口開口中呢？跟住節課虹姐就坐過嚟啦。