係時候應該數落數落吓阿Ling啦，的確，就算榮登「至傻皇后」嘅寶座之後，仍唔作自身檢討，繼續將「傻氣」，發揚光大，班上越嚟越多人越傻，呢度，就唔作點名啦（自己應該都知自己事）。
不過，點講都好，都唔可以唔講佢，Ling。佢實在有太多嘅事蹟被我哋去奚落啦。成日都講埋啲唔經大腦嘅嘢，佢同金蘭姊妹啊大奶燕半斤八兩，有次大奶燕話：「不如問吓化學老師睇吓佢識唔識做化學題？」化學老師唔識做佢重做老師嚟做咩？Ling一樣傻，有次問神棍：「你問一條我唔識嘅問題，睇吓我識唔識？」真係冇嘢講，神棍奉勸過佢啦，思想咁單純，遲早有日俾金魚佬奸咗都唔咩事。
譬如話啱啱建報台嘅時候就遷出留言，搞到相當一部分人唔知點留言，阿Ling係典範之中嘅典範。因為擺烏龍上唔到，就問點解：「點解唔得嘅？」
「係唔係因為驗證碼嘅問題啊？」神棍問。
「唔係啊……」Ling回答。
「一係你post你登入留言台張照片啊。」
「哦。」
冇幾耐，佢post張相係：「Opps！對不起，台長已關閉了留言版。」係人睇到都應知道咩問題，上錯地方留言，咁Survey見到咪笑Ling傻囉。
「點解我上唔到嘅？」
「因為IQ問題。」神棍睇完都知咩事咖啦。
「係RP問題！」Survey話。
Ling重以為「RP」係啲電腦網路之類嘅術語，就話：「我唔係IQ問題，係RP問題！！！」
殊不知，「RP」者，即是「人品」也……