虹姐有時講嘢唔知佢係詐傻扮懵，定係講嘢嘅時候個腦冇運作，硬係有啲出人意表嘅言論，去引起大家注意。
虹姐同神棍講話佢屋企晚黑都唔煮飯，神棍就問咁佢啲哋成家人食咩。
虹姐就話：「我哋一般都出去食飯咖，一唔係就嗌個工人煮。」
「嘩……你阿媽唔識煮飯咖？」神棍問。
「我哋成家人都唔識煮飯咖，都係叫工人煮。」
「虹姐，乜你哋屋企咁勁嘅，我屋企都係自己煮咖。」笑笑聽到就話。
「邊似你屋企咁好景啊，日日出街食，你以為唔使錢啊！」小溪同虹姐講。
「乜你哋個個都喺屋企煮飯食嘅，好畸形啊……」虹姐覺得我哋好奇怪，「咁，你哋行街行唔行路咖？」
笑笑聽完笑到停唔得口，神棍反返轉問佢：「你屙屎用唔用屎塔咖？」
「乜叫「屎塔」啊？」虹姐問。
「「屎坑」知喇啩！？」神棍話。
虹姐一臉毫不知情嘅樣：「我一般喺香港行街都係專車接送咖~」
「咁用咩牌子車啊？」神棍問。
「寶馬、豐田~」
「嘩……人哋坐開都係「Rolls Royce」咖噃。」
「咩係「撈屎來食」啊？」虹姐問。
「勞斯……」小溪話。
「萊斯囉！」笑笑補充。
「哦……乜你哋行街要行路咖，咁畸形嘅……」虹姐竟然取笑我哋係異類，其實唔知最為異類嘅係佢自己。