很想和你吃吃風

繼續上一次‧篇
話說星期日晚回到家已經十二時，落床訓經已係兩點幾
睡了一會，真的是一會，五點幾就起身
大佬，係五點幾!!
起身望住個天，覺得好面善，平時我就係係呢個時間訓架..
在睡夢中梳洗。又真係俾我搭到第一班地鐵，六點九就到到柴灣，再轉小巴去大潭數車。為左呢三百幾蚊，真係會冇命。
唔單上早，仲大風到唔係人企架!!
早上七至九時站著吃了兩小時西北風後，感覺不太飽，於是同kris，jovan落小西灣麥當當食正餐。我地都凍到傻左既時間，隔離檯個女人竟然著背心law，佢係咪唔知清朝已經被推翻左，仲以為自己係清兵??心口真係有個勇字架!!

聊了一會就上山回校，在巴士上睡得很熟
在圖書館做了一會news cut，諗住夠鐘上exp psy，就好醒咁打俾jovan叫醒佢上堂。點知俾個肯定未訓醒既同學仔發現仲有一堂先夠鐘...都唔知邊個未訓醒。之後就去so房訓，訓到手臂遞唔起。
之後就搭笠落去上堂，唉。
雖然訓得兩個幾鐘，但上grace堂又冇乜想訓既感覺。
可能係有第二種更強既感覺掛?
上完落就去七仔買叮叮食，又上那輛去小西灣既巴士(呢個鐘數，下次真係唔好上車，成架車d人好似被人殺左全家咁，大怨氣到不得了)，跟住再轉14號到大潭再數車。晚上氣溫都唔知有冇十度，凍到成個人冇晒知覺，真係伶隻腳去撞條柱都唔會有感覺，好恐怖。好彩冇乜車，又有寶係度，三個人邊玩遊戲邊講笑就過了兩小時。

風的味道，有點淡
刺骨發抖的感覺，有點痛
呆坐路邊，忽然，很想有輛車向我駛開來
經歷那實在的痛，好讓我知道我依然有血有肉的存在著