來無張弛，去無相辭

 

        無注意對底時開始，我透早不時都予一隻鳥仔的叫聲共我吵精神。

       「ku–ku–kuh——ku–ku–kuh——」

　　聲音就佇窗仔門外，聽起來低沉低沉，又閣敢若真熟似，毋過我想誠久就是想袂起來，彼到底是啥物鳥仔的叫聲？連紲幾工了後，我臆伊毋是過路客，伊應該是厝邊毋知佗一家口，飼來看古董做議量的。

　　佳哉通常伊叫的時陣我嘛差不多欲起床矣，尤其暗時伊真安靜，袂去吵著我的眠，所以真緊我就共伊融合佇我的早起裡，就親像以早，共喝燒肉粽的融合佇我的暗暝。

　　五月的一个禮拜六，我的後生對兵仔營轉來歇假，伊共我講伊房間彼台古魯斯古的冷氣已經賰送風的功能，而且吹起來規台浪浪叫，袂輸像戰車。

　　我指頭仔拗拗共算算咧，彼台冷氣嘛已經吹過誠十个熱天，嘛算是有夠本矣，心內想講無來換一台新的，無嘛較袂遐傷電。毋過我閣想著房間外口的鐵窗，敢若嘛幾若年毋捌漆，略仔哩生鉎矣，就佮後生參詳，決定先買油漆轉來漆鐵窗，漆好才叫人來換新冷氣。

　　孝子的我毋敢延延，隔轉早起看好天，就隨去大賣場買油漆轉來動工。我先漆後生房間的鐵窗，那漆那大聲喝當咧浴間仔洗剝落來的窗仔門的後生，洗好紲去共我房間的窗仔嘛剝落來。

　　「你房間嘛欲順紲漆喔？」後生攑一片那佇滴水的窗仔行入來房間問我。

　　「毋紲漆漆咧，無漆你房間賰的漆欲倒掉？一爿新一爿舊敢會看口的？」

　　後生聽我講了，窗仔門囥咧，就行對我的房間去。

　　「哈哈！」

　　一睏仔囝，我聽著後生佇我的房間大笑二聲，紲落就聽著伊閣行倒轉來，徛佇我的身後講：

　　「你看！這是啥貨？」

　　我人徛佇馬椅頂，一手攑漆筅，一手捾漆，頂半身軁佇冷氣頂面的氣窗外口，聽著後生喝聲，我勻勻仔共身軀勼倒轉來，越頭去看伊提叫我看的物件。

　　「鳥仔卵？」看著後生手裡提一粒若草橄欖大的白卵，我驚一趒：「你佗提彼？」

　　「你的窗仔門外口啊！」後生那講那笑，袂輸我是佇問伊我曩袋仔內底袋的物件佗位來的。

　　我趕緊對馬椅頂落來，共油漆、漆筅囥好勢，手囊褪掉，接過後生手裡彼粒卵，隨行轉隔壁我家己的房間。

　　我的房間雙面有窗，後生剝落來的是中層有安冷氣的西爿窗的下層，這面窗不比北爿彼扇倚一塊畸零地、看會著樹青又閣較袂吵的窗仔，伊毋旦西照日，閣倚一條定定有機車赴赴叫的六米巷，所以我用佮壁堵仝色的米色底摻淺茄仔色幼花的壁紙，共伊的玻璃部份貼起來，平常時嘛攏關牢牢，真罕得拍開。等我行倚這面等於是半封閉的窗仔，對窗外共看去，干焦看著窗外的鐵窗頂面櫳櫳鋪著幾枝焦草枝。

　　彼敢是鳥仔岫？頭一眼我捎無，因為伊佮我捌看過的編織甲真功夫、造型像一塊碗的鳥仔岫比較起來，實在是真無仝款。頭殼向較低咧，閣共看予伊斟酌，我看著鐵窗頂面有一條線，彼是連接我房間數據機佮後生房間電腦的一條網路線，當初後生佇牽的時，拍算是線傷長，伊共蜷蜷做一个線蜷，架佇鐵窗頂面，想袂到彼个線蜷佇鳥仔的目睭內，竟然是一个現成好用的地基，怹只要閣咬幾枝焦草來鋪佇頂面，一个省工省料的岫就完成矣。

　　「鳥仔咧？」勉強認出鐵窗頂面彼堆焦草是一个鳥仔岫，我開始揣事主。我共頭殼伸出去窗仔門外頂頂下下一直揣，一時仔久，就予我佇巷仔對面的電線頂頭，去發現著一隻頷頸後面袚一條烏底白點領巾的鳥仔，用倒吊的姿勢攀佇遐掠我金金看。

　　「佇遐啦！是一隻斑鴿。」我報後生看。

　　「你哪會知影是伊？」後生共伊的金剛頭攄倚來。

　　「眼神，伊用眼神共我講彼是伊的囡仔。」

　　我趕緊共卵輕輕囥轉去彼个看起來有淡薄仔偷工減料嫌疑，無甲偌堅固的鳥仔岫，順手閣共後生剝落來的窗仔門鬥倒轉，挩起來。

　　「看來賰的漆真正愛倒掉矣。」我對後生講。

　　較晏，我的查某囝佇學校的英語話劇公演排練煞轉來，我共講窗仔門外口有一隻鳥仔來做岫，問伊欲看覓否？

　　「人才無愛咧！」伊喙仔嘟嘟，越咧關入去家己的房間。我才去想著伊細漢的代誌：彼陣伊才拄會曉行，有一个朋友送我一對伊飼的紅目小鸚生湠的鳥仔囝，我掠轉來暫時先共關佇一跤大跤紙箱仔內底。伊感覺新奇，徛佇邊仔看，一手提奶矸仔那佇欶奶，欶咧欶咧毋知按怎一時徛無好勢，人煞雄雄向頭前躄落去，伊本能的反應，用手去揤塗跤，結果毋知哪會遐拄好，對對去揤著其中一隻鳥囝的跤骨；彼隻鳥囝予揤一下啾啾叫，拖一肢斷去的跤佇紙箱仔內底烏亂傱，伊驚一下面色青恂恂，想欲哀哀袂出來，等我傱倚緊共抱起來，伊才開始開聲吼，吼足久足久攏袂恬。一直甲這馬，大學三年矣，伊心靈的創傷佮彼隻斷跤的鳥囝仝款——會好袂完全。

　　第二工早起，我就共我彼台真久無用的４０倍光學變焦鏡頭的類單眼相機，對櫥仔底反出來。這種號稱「散赤人大砲」的相機，雖然成像的畫質毋是蓋理想，毋過若只是翕趣味的，對畫質毋是遐計較，用伊來觀察、翕抑是錄袂當傷倚近的鳥仔、蝶仔，彼就真正袂歹用。尤其伊有一塊會當反踅的液晶螢幕，利用彼塊螢幕，我只要共相機伸出去窗仔門外，人徛佇後生的房間內底，就會當真清楚觀察著距離四、五米遠，鳥仔岫內底鳥仔的動靜，袂去共嚇驚著。

　　我連紲觀察二、三个早暗，攏干焦看著鳥母家己一个，真盡責跔佇岫內咧孵伊的卵，連走閃都無走閃。

　　鳥公咧？我心內憢疑，假使無鳥公共鬥相共，伊按呢無食無啉，是會當堅持偌久？

　　閣經過二、三工的一个透早，我猶閣當咧好睏，雄雄去予鳥母ku–ku叫的聲音共我吵起來。彼佮伊平常時「ku–ku–kuh——」的叫法無仝，干焦「ku–ku」二短聲，而且真連捷、真趕緊，聽起來閣敢若真興奮。我直覺有事，對眠床跳起來，順手去捎囥佇電腦桌頂的相機，直接衝向隔壁房間。等我相機撨好勢，液晶螢幕扳起來，隨著鏡頭內底的影像愈搝愈倚，我的心嘛像一粒浮筒，愈浮愈懸。

　　鳥公來矣！伊的體材看起來佮鳥母差不多，毋過神態予人的感覺就是加誠雄猛。伊胸仔挺挺徛佇鐵窗邊，鳥母看著伊袂輸是王寶釧去看著薛平貴，隨徛起來，ku–ku叫向伊行倚。彼是對彼工佇電線頂看著伊到今，頭一擺看伊閣離開伊的岫，嘛是遮濟工來，我再次有機會去看著彼粒卵。

　　卵破去矣！變做幾片破碎的卵殼，佮一隻烏魯魯的鳥仔囝。鳥囝的頭殼佮身軀攏是聳聳的苦毛仔，雄雄看袂輸是幔一領棕簑，伊的喙長長、槌槌，看起來敢若講白賊話鼻仔變長的「小木偶」，形體佮別種鳥囝比起來實在是無算媠，就連古錐度，可能嘛真歹排會著等。毋過鳥母肯定無按呢認為，伊徛佇鳥公佮鳥囝中間，看起來真得意，若像是佇共鳥公展寶講：「你看，這就是咱的寶貝！」

　　鳥公嘛毋知是個性柴頭，抑是感受著囡仔出世了後擔頭的沉重，伊看起來並無啥物特別的反應，干焦徛佇遠遠看鳥囝，一時仔久，就閣越頭飛走矣。鳥母一看鳥公走，就隨閣行轉伊的岫，共鳥囝ānn佇伊的身軀下底，藏起來。

　　「ku–ku–kuh——ku–ku–kuh——」

　　就佇我pǹg鳥公的福氣去看著鳥囝的隔轉工，真早就聽著鳥母又閣佇呼伴，等較晏我閣去隔壁間共看，鳥母已經無去矣！

　　鳥母咧？伊哪會共拄出世的鳥囝家己擲佇岫內？無敢會去揣食的，抑是去揣伊的平貴？雖然有一點仔擔心，毋過我想既然鳥囝猶佇岫內，鳥母應該連鞭就轉來矣吧！

　　到暗時我下班轉來，閣走去共看，鳥母竟然猶是無轉來。這聲我開始緊張矣，真驚鳥囝是去予鳥母共放鳥。看著鳥囝家己一个無依無倚，勼佇已經予烏夜籠罩的冷冷壁角，我真替伊擔心，毋知伊是毋是有法度度過無鳥母保護的漫漫長夜。

　　佮我的緊張比起來，才拄出世無幾工的鳥囝顛倒加誠鎮靜，伊袂輸是佇卵殼內底就捌上過課，知影愛按怎應付眼前的危機，伊無大細聲叫，嘛無亂傱，伊只是真巴結跔佇岫內，恬恬接受大自然「物競天擇」的考驗。

　　雖然知影彼是「父母生成」，毋過彼暗我猶是擋袂牢，上網去揣人工養飼野生斑鴿的方法，我想萬不二鳥母若真正一去不回，可能無法度的情形下，我猶是只好選擇「弟子作孽」。

　　一工、二工、三工過去，雖然我猶是無看著鳥母轉來，毋過我嘛無選擇用人工的方式飼鳥囝。因為我發覺伊毋旦無因為枵飢變虛弱，顛倒是一暝大一寸，袂輸用灌風的。伊身軀的苦毛仔愈來愈少，羽毛愈發愈茂，尾翅開始看會著一節白巡，喙桮慢慢倒勾，喙尾嘛愈來愈尖，詳細共看，伊已經愈來愈有一隻斑鴿的架勢。

　　我相信伊毋是欶空氣大隻的，應該是我出門上班的時陣……

　　「ku–ku–kuh——ku–ku–kuh——」

　　就佇鳥母飛走了後的第九工早起，我又閣聽著彼个已經期待誠久的聲音。

　　「bi——bi——」鳥囝並我較興奮，伊佇岫內大聲回應。

　　鳥母的聲音有淡薄仔距離，斷斷續續，混雜佇白頭鵠含厝鳥仔的叫聲內底。鳥囝耳空搤利利，頭殼越來越去，一對向望的烏目睭遮看遐揣。

　　「ku–ku–kuh——」聲音倚近矣。

　　「bi——bi——」鳥囝那叫翅股那顫振動，看起來袂輸是佇共鳥母擛手，叫鳥母緊來。

　　「ku–ku–kuh——」

　　「bi——」

　　「ku–ku–kuh——」

　　「bi——」

　　鳥母呼一聲，鳥囝就應一下，翅股愈顫愈出力。

　　「ku–ku–kuh——」

　　「bi—bi—bi——」

　　鳥囝拍算枵甲擋袂牢矣，伊出力徛起來，共二爿翅股展開夯甲懸懸懸，捎咧一直翩。

　　當當鳥囝當咧興奮的時，鳥母袂輸是刁工欲佮鳥囝掩咯雞，雄雄伊的叫聲又閣恬去。聽無鳥母的叫聲，鳥囝無意無意閣坐落來，兩蕊目睭眨眨nih。

　　「ku–ku–kuh——」鳥母閣呼矣。

　　「bi——」鳥囝的翅閣開始顫振動

　　「ku–ku–kuh——」

　　「bi——」

　　鳥母呼伊就應，翅一直翩，連紲幾遍了後，猶是無看著鳥母出現，伊拍算不耐煩矣，徛起來，佇岫內３６０度踅一輾，才閣坐倒轉去，像一个討真久猶討無糖仔的囡仔，坐佇塗跤張。

　　「ku–ku–kuh——ku–ku–kuh——」鳥母繼續一直共呼。

　　「bi！」伊受氣矣。

　　鳥母拍算嘛聽出來鳥囝佇張矣，伊閣呼二、三聲了後，就敢若早期電視武俠齣內底輕功高強的女俠，雄雄毋知對佗位跳出來，出現佇當哩錄影的鏡頭內底。

　　「bi——bi——bi——」

　　看著鳥母出現鳥囝真激動，伊的翅一直翩一直翩，煞落伊共身軀圇低，二肢翅股夯佇頭殼尾頂一直掣、一直翩，動作看起來竟然就敢若是佇對伊的娘親跪拜；然後鳥母行倚鳥囝，共伊的喙略略仔剝開，這陣鳥囝才徛起來，敧進前用伊的翅股去攬鳥母，然後共伊的喙伸入去鳥母的喙空，食鳥母反芻出來的食物，一睏仔，鳥母翻身想欲走矣，毋過鳥囝敢若猶食無夠氣，纏牢牢毋肯放伊走；鳥母無法度又閣越頭，干焦看伊共身軀向落閣挺起來、向落閣挺起來，連紲重複幾遍仝款的動作，反芻出閣較濟的食物予鳥囝，一直到腹肚底無物件矣，伊才翻身飛出去。

　　伊飛出去並無隨離開，伊歇佇距離六米、岫對面的電線，佇遐恬恬看伊的囝，就敢若一个詩人，佇欣賞家己精心創作的一首詩。

　　量約誠點鐘後，換鳥公來矣，二隻親鳥就敢若C１３０運輸機，一逝一逝共鳥囝的營養補給空運過來。

　　我想鳥母應該就是因為需要用真濟時間去揣食物，才會較晏出現，無疑悟煞予我誤解，差一屑屑仔因為按呢懵懂作孽！

　　連紲二、三工，我攏看著二隻親鳥按呢哩飼鳥囝，有一工鳥母拄來，雄雄落雨，一寡鳥仔啾啾叫四散飛了了，我想鳥母應該嘛會緊飼飼咧緊走，毋過真奇怪，伊並無趕緊，伊甘願雨仔那沃就是堅持欲照步來。

　　「ku–ku–kuh——」

　　「bi——」

　　「ku–ku–kuh——」

　　「bi——」

　　無管雨是毋是愈落愈粗，伊就是一定愛先共鳥囝弄甲嚓嚓趒，伊才欲開始飼。

　　為啥物按呢咧？我想怹這个飼食進前的固定儀式，一定有隱藏著啥物特殊意義，只是我毋捌。

　　就佇我閣看著鳥母轉來的第五工透早，我起來看著鳥囝就去予驚一趒；伊竟然走去徛佇鐵窗邊仔臨臨的所在，面向外口，看起來是佇等鳥母。嘛毋知伊是枵矣，抑是等怹老母等甲傷無聊，有當時會看著伊共頭殼向落，用伊愈來愈尖的喙對鐵窗頂面烏白亂啄。看著伊「啄」，我想伊應該真緊就會曉家己討食，毋免閣做靠爸、靠母族矣。

　　七點偌鳥母來矣，伊照慣例先歇佇電線頂頭呼囝。我靠勢進前幾工的經驗，想講至少猶有幾分鐘的時間，主戲才會上場，就沓沓仔撨tshāi佇窗門口的相機角度，準備鳥母若飛入來通好閣錄影；啥知鳥母才呼沒幾聲，雄雄鳥囝雙翅一翩，已經像一个拄佇學溜冰的囡仔，用無甲偌熟練的姿勢跙過六米巷，去歇佇鳥母身邊的電線。

　　我規个愣去，當當我猶佇喙仔開開人傷重，袂曉通反應的時，鳥母已經飛起來矣，只是這回伊毋是飛入鐵窗，伊是直接飛向天際。鳥囝一看鳥母飛起來，連躊躇嘛無躊躇，雙翅出力一翩，就綴鳥母後面飛去。

　　雖然對怹來彼工就知影有一工怹會走，雖然知影怹是經過包括大自然佮人類在內的層層關卡，真無簡單才會當自由佇天際飛來飛去，毋過雄雄看怹離開，心肝頭猶是感覺略仔砧砧，袂輸失去啥物。

　　鳥仔無閣轉來矣，雖然逐工目睭擘金，猶是習慣性共耳空搤利利，斟酌聽窗仔門外口的動靜，毋過我知影怹飛去就袂閣轉來矣。　　　　　　　　　　　　　　　　　　　　　　　　　　　　　　　　

　　怹飛去佇公園、飛去佇草埔、飛去佇樹掗、飛去佇別人的厝尾頂，嘛飛去佇安全島、飛去佇高架橋的下面。

　　我比以早閣較注意看怹無算彩麗的身影，我比以早閣較用心聽怹無算清脆好聽的叫聲，我才發現，原來怹一直攏飛佇我的四箍輾轉。

　　「飛吧！」我對怹講：

　　「我來無張弛，去無相辭的朋友，祝福恁！」