透早，位滴滴沓沓的雨聲中醒來，一本冊坦匼佇枕頭邊，昨暝我又閣睏佇冊的內底，毋知是佗一个時空，佗一个朝代，收留了我厭懶的夢魂。

恬tsih tsih的厝內猶閣淡薄仔暗漠，一四界看無阿母的形影，我佇門後攑一枝雨傘，開門行向厝前彼條水蛇仔泅的小路。一陣山風輕輕吹來，煞感覺手骨淡薄仔涼冷，昨昏起來山頂的時，台北猶閣真燒熱，干焦穿一領薄縭絲的短手䘼仔衫，無想著透早的山頂遮爾涼冷。

雨一直落無停，只是一陣一陣，有時霎有時粗。早霧是一个身段柔軟的舞者，伊隨著山風的旋律起舞，幔佇伊身軀彼領白紗巾，就綴著伊的舞步，位這爿山颺過彼爿陵，眼前是一片澹溡的白茫。

崁邊的幾股菜股，擽絲擽絲種幾欉金針，幾欉臭赤臭赤的番薯葉佮紅菜，以及幾枝轉骨轉無過，黃酸黃酸的蕗蕎，遐的攏是阿母的傑作。山頂塗質無好，閣傷厚雨水，種的菜定定予雨水浸爛，三不五時著風勢閣會落酸雨，菜葉仔真容易釘點臭赤，菜閣較按怎照顧嘛真歹種會媠，干焦會當罔做議量，運動兼消磨時間。

阿母並無佇菜園仔。透早的空氣誠好，飽滇的甘甜透濫著樹木青翠的芳味，我毋甘倒轉去，繼續順著菜園仔邊的小路，向基隆山跤沓沓仔散步，沉迷佇雨水洗盪清氣的山色。

樹椏頂一對早起的白頭鵠仔佇唱歌相褒，菅芒菢內底一群青啼仔，嘛用怹幼膩的聲喉綴人食米粉喝燒，佇迷迷茫茫的霧的內底，傳來遠遠近近，各種鳥隻懸下聲部的合唱。

山跤的溪谷，一道男下音的水流，共真久以來胸槽的坱埃，做一下洗汰清氣。雖然是行踏佇茫茫渺渺的霧中，卻是感覺著家己無比真實的存在。

這是佇台北走揣誠久，佇挨挨陣陣的人群中，佇閃閃爍爍的燈海，一直走揣袂著的感覺。佇彼个畫紅漆白，外表妝甲五彩燦爛的繁華城市，人心是空虛的，靈魂是濁的，人只是綴現實生活走傱的影，只有等最後一葩電火切化，才會當停跤，歇佇忝忝的一片烏暗。

行到半山腰的所在，霎雨總算停落來歇喘，煞看著群峰覕佇一簾銀幕的後面，一觸久仔這山現身，一觸久仔彼嶺露面，據在山風導演，看欲叫siáng上台，演出一幕一幕風華各異的潑墨山水。

一隻覓鴞位雲縫竄出，伊展翼佇雲空的孤影，散發出一股不可侵犯的高傲，就算飛佇歹天的亂流當中，猶原不改伊眼光射出的堅定。

山壁頂一撮一撮，草青內底黃錦錦的花蕊，是開甲當紲拍的白豬母奶，這个時陣是伊奢颺的季節，規東北角的岩壁攏是伊的舞台，就算是佇薄霧當中，猶是掩崁袂牢伊金黃色的光芒。

望對兩爿山脈中間，水湳洞的陰陽海，一片藍藍的海水，去予礦山泏出來的油彩，皂甲也有柑仔紅，也有金黃色。這座礦山曾經遐爾奢颺，規身軀金光閃閃，但究竟袂堪得無盡的慾望損蕩，以及無情的歲月挨磨，漸漸退去伊框金的光環，伊記持內底的光彩。佮遐的老礦工鬥陣退休了後，伊就專心畫圖，共海面當做畫布，上愛畫黃昏的時，夕陽佮彩霞難分難離的情意綿綿。

正當我予眼前的美景勾引甲憨神憨神的時陣，對面崁頂雲霧當中，無張持傳來鑿耳的電子琴喪樂聲，挵破靜美的一幅畫。

每一曲美妙的旋律，早慢攏愛休止佇恬靜，人的性命嘛是相像。但是毋是最後的一个嘹拍，會當結束甲真幽雅，莫有遐爾濟悲傷，莫有遐爾濟吵抐，就親像一滴雨水回歸大海按呢，遐爾仔自然，遐爾仔平靜。山，照常疊坐佇恬靜，無驚走一隻樹椏頂的野鳥。

行轉到厝，阿母已經坐佇大廳的藤椅頂。伊掛一支老歲仔目鏡，頷頸伸甲長長長，喙仔開開，就親像囡仔佇看bang-ga按呢，目睭𥍉都無𥍉，當咧看電視轉播的撞球比賽，看甲是遐爾仔入神。我實在真毋敢相信，一个八十歲的老大人，竟然會佮人迷撞球。

阿母看我轉來，才位電視內底緊張的撞球比賽回魂轉來，伊徛起身，位身軀邊的塑膠袋仔內底，反出一領綠豆色的長手䘼仔衫，講是拄才去瑞芳買的，叫我緊穿看覓。我想伊一定是透早起來，吹著第一陣冷風的時陣，已經預先感應著我手骨的涼意。雖然阿母買的衫有一點仔倯，毋是我所佮意的形體，但是穿佇身軀頂，猶是予我感受著春暉照射的溫暖。

我坐落來佮伊做伙看撞球，聽伊解說我少年的時陣就知影的撞球規則，聽伊紹介每一個選手，看著伊支持的選手脫箠，綴伊哀聲頓蹄，看著伊支持的選手表現精彩，就綴伊拍噗仔喝咻。伊講最近厝邊隔壁的老歲仔伴攏佇痟撞球，逐家食飽椅頭仔夯咧，坐踮榕仔跤開講，上捷講的話題嘛是撞球。

我想按呢嘛是好啦！這撮仔攏總蹛十偌戶，總人口卻是賰無三十人，真濟攏是家己一个人蹛的孤單老人。遮的老人自少年就蹛佇遮，佇遮生湠，佇遮共囡仔慢慢仔捏大，然後看怹像翼股尾漸漸焦的鳥仔囝按呢，一个一个捾著kha-báng飛出岫，飛出這群山嶺，佇山的另外一爿討食，佇山的另外一爿建立怹家己的岫。有時陣老人嘛會去台北看序細仔，但總是敢若咧搵豆油咧，無三天就蹛袂牢矣。怹數念囝兒序細，但怹慣勢遮的空氣，遮的山，遮的水，遮的有人情味的厝邊，遮的....稀微。會當培養一寡興趣，一寡正當娛樂，生活總是較袂白甲遐爾空虛。

中晝頓是阿母透早去瑞芳街仔買的一尾黃魚，一爿鹹水雞，佮兩項青菜。平常時伊家己一个攏是凊彩食，我轉來伊才會攢甲特別腥臊。伊知影我無愛食鹹，一直問我菜會傷鹹否？我笑笑。外口餐廳的總舖師知影，怹閣較高段的料理，永遠攏減一味，所以怹須要用重口味來唌人客的喙斗。阿母煮的菜有滿墘的阿母的氣味，這是任何總舖師料理袂出來的，任何芳料無法度代替的，我想天跤下應該無人會嫌這種芳喟傷重。雖然外口又閣咧落涼冷的毛毛仔雨，但阮的飯桌頂，有上豐沛的燒烙。

欲暗仔的時，我必須轉去台北矣，我問阿母敢有想欲去草山賞花。伊講落雨沓滴看啥物花？少年人的情調伊毋捌，踮厝裡看撞球較贏。

車開行的時陣，阿母就徛佇門口埕金金看，看我的背影，消失佇雨霧當中。而阿母一菢銀白，痀痀的影，就佇車的後鏡內底，沓沓茫霧。