Hello，大家好嘛，我好耐冇上黎啦，你地唔會唔記得我呱!

因為最近呢兩個禮拜都返夜，工作糧俾上幾個月多左好多，確實非常辛苦，甚至差o的病到呀，所以都提唔起精神上黎同大家通訊。原來o係呢幾個禮拜發生左咁多事，有開心o既，亦都有唔開心o既，確實令我有o的好意思，因為唔能夠分享到大家o既喜悅同埋悲痛!

首先o係度恭喜國浩搵到另一份新工作，希望呢一份唔會好似上一份咁辛苦啦。咁都證明左你o既衰運會慢慢咁離你而去，太好啦~

接住就到零浩啦，一位親人離去確實令人非常傷心，尤其親眼送別自己親人走更加係悲痛不已，希望你可以襯住去韓國旅行，玩開心o的，將o的唔開心o既野忘記佢，重新振作呀!其實我自己麻麻亦都已經過左身，我唯一遺憾o既係，唔能夠見佢最後一面，因為我麻麻係o係鄉下養病o既，但因為我仲讀緊書，所以唔方便返鄉下，最後只能夠o係電話知道佢過身o既消息，o個一刻真係有o的覺得自己好不孝!

阿風同Maggie你地兩個最近o既環境都唔錯喎，一個有人工加(需然係好辛苦咁爭取返黎o既)，一個有團帶，似乎大家都開始行運啦!

呢幾日我有同事叫我同佢一齊發起公司加人工o既激烈行動，我呢一個同事o係公司做左八年，而我只係做左5個月，我冇理由同係一齊癲架，萬一事敗，我真係好驚連份工都冇埋呀!

不過其實三月份工作量真係多左好多，我已經連續十二日要開工，尤其返夜晚真係做到個人殘晒，有次仲做到隻手無晒力，可能係成日要打字o既關係啦，我真係有諗過唔做架，不過唔係話唔做就唔做，搵食係咁辛若架啦~

我已經開始搵緊其他o既工作，但係消息就仲未有，我其實本來係想o係呢間公司做一年o既時間，不過唔知我堅唔堅持到呢?

希望大家能夠繼續努力工作，堅持自己o既信念，大家一切加油吧!

(註：呢一幅係我屋企隻狗狗"餃子"，係唔係好可愛呢!)

Anfview
05/04/2004