【你的DSE時間表＃3】點訂立Study Plan ？溫書點入手？

1. 訂立恰當温習計劃

今年2020 DSE考生可以話係多災多難，我估大家如果勤力少少既都會有做過DSE Timetable時間表架啦，但係我想勸勉大家千祈唔好訂個目標太高，我嗰時一日温習大概8個鐘左右，其餘時間做番自己既興趣(打機)中和下。排得太緊一黎你會太早chur盡失去鬥志，二黎你一達唔到目標會好難追番打亂節奏。一星期最少都要預留1-2日比同friend出去玩。

個計劃盡量以温習內容黎定一個時節 (温完trigo嗰3課書/ 做完一份reading…) 而唔係計時間 （兩個鐘温完中文)，唔洗限死話某個時間要温完一科，唔好迫自己趕收工咁温。

不同科目時間分配：
一日最好既話温大約3科，建議大家2文科（中英LS) + 1理/商科或者1文科+2理/商，每科約3小時既workload（做完一份past paper+對卷差唔多)，如果想多元化啲可以一日温4科，但每科各自温少啲時間，並且比文/理科目都有温到。

 以下係一個例子：
上午：温熟完YY Regular 7-9期、
中午：Physics既Radioactivity Chapter
下午：睇哂LS Module 2既各種energy type + impacts + properties

右面課程會好詳細講解呢套溫習計劃，好建議大家睇睇： https://ffclassroom.com/courses/study/

理想既話以4-5日為一單位，姐係訂立呢4-5日一定要温完既課題、做完既練習。我自己就以5日為一單位，其中1日休息，其餘4日循環咁温哂我嗰7科唔同課題（放棄左M2) 同做練習。唔可以比任何一科空置超過一星期，尤其背書科 (Chem /Econ)，如果唔係會唔記得，如果嗰5日温唔哂，推落下一個5日都可以。

以下係一個例子： 每個單位温既科都可以唔同。
Day1: 休息
Day2: Chin + Eng + Econ
Day3: Eng + LS + Maths
Day4: LS + Phy + Chem
Day5: Chin + Chem + Econ

暑假温習應以重温鞏固已有知識為重，不必趕住做CE past paper。7月至8月頭應盡量將一科全部教科書由睇温習一次並且做筆記。確保教過既Topic已經入哂腦，加上啱啱考完試温黎都輕鬆啲。當你對教科書、學校notes (如有用）好熟之後就開始清埋你既補習筆記，如果你學校野無用就直接7月中開始温補習筆記啦。8月尾、9月開學再開始做past paper/exercise都唔遲。

2.理科同學的學習計劃

面講既就係理科既温習方式，應用既層面好廣！ 理科包括啲咩 ? 基本上問答模式如果大多是直接利用書本指引的步驟尋找答案，或是利用已有知識去推斷原因、解釋現象、提供建議，就可以當作是理科。因此，數學、Phy、Chem、Bio、甚至Econ、BAFS都可以算做係理科。

1. 温習理科首要條件
由於理科多數要求學生對科目既固有知識 (如定義Definition,方程式Formula, 化學物質性質) 非常熟悉，因此對書本上既知識既掌握尤其重要。我覺得雖然操練係學習理科既核心，但操Past Paper或練習之前最好係將整個課程的教科書 (或學校筆記) 由頭到尾温習多於一次。☺️
第一次由頭温到尾係非常認真地讀，每一個部分都嘗試不斷背誦，尤其Definition，温完一個chapter去下一個chapter之前確保自己對每上一個chapter大部分內容都能夠背出黎，盡量試試背誦書上大部分內容 (自行篩選不重要的)。如是者由第一個Chapter讀到尾，過程會很漫長，但回報絕對值得。數學科的話記得將F1-F3的教科書都温一次，而且都要係精讀 。

2. 完成第一次精讀
當你已經由頭到尾讀過一次課程範圍後，就可以係記憶仲新鮮既時候嘗試一下做有關既練習同埋年代久遠既CE By Topic或者By Year，由2000年開始做起已經好足夠)。呢個時候我建議一定要為每一科開一本簿專門記錄練習既題目，我叫佢做「試題庫」，每次做練習既時候都一定要拎出黎，係做既時候將唔識既題目同埋特別既題型抄落去，而係對答案既時候將你錯左、中伏、同問法新穎既題目都抄落去。對答案非常重要，絕對唔可以做完練習唔對答案。你亦都可以係練習或者PP上面同螢光筆Highlight🖍，然後本簿就係寫邊版有咩Concept係一定要記得。有關做練習既次序，我建議先做CE By Topic或者By Year (我當時係由2000開始做By Year) (按這裏加你的科目到Google Drive)，然後做坊間練習 (如Joint Us)。

3. 已開始操練
係操練既過程我極度推薦再温多幾次成個syllabus，可能你做左一個星期練習後記憶開始模糊，呢個時候你應該再拎哂所有教科書或者學校筆記出黎。呢次應該係比較快速咁温，重點再背熟一定要背既Definition, 化學性質，Accounting Principle等等。因為你上次已經温得好熟，所以你呢次再背過書既內容應該快好多。如果時間允許，我好建議你係第二次温書既時候為每一科再開多一本「速讀簿」，係温習既時候將每一科重點同易遺忘既內容都詳細抄落去，下次温書既時候就唔再需要重新睇哂成套教科書，只係需要温你本速讀簿。

4. 繼續重覆温習教科書
如果例如一個月後你又開始遺忘課本既知識，我提議可以再由頭到尾温一次你本速讀簿、課程範會同埋你既練習題目簿。如果你覺得自己對呢科掌握已經足夠，可以試一試挑戰DSE Past Paper，做完後繼續將題目同答案寫入「試題庫」，而係每次做DSE Past Paper之前都將你有既兩本簿温一次，直至做完所有手頭上練習為止。