睇張小嫻的<<相逢>>時好有共鳴, 令我諗番起好多事情, 亦令我諗番起生命中遇到過的六位男子......
第一個...仲記得係小五的時候, 那年聖誕節收到對方送的聖誕咭, 是一張音樂聖誕咭(需知道通常送的只會係普通聖誕咭, 有音樂那種要成十幾元一張, 送得o既都應該有d"用意"...), 收到時對方說要我回到家才能拆開. 返到屋企一拆開---差一點沒被嚇死~~~ 上款寫著"我最愛的XXX", 內容是什麼"做我女朋友"之類的東西, 下款簡直係"奪命"~~~ 寫住"班上最愛您的人 XXX"(<---我幾乎記唔起對方的名字)嘩~~! 嚇到我叫救命, 即刻同家姐講, 之後用枝筆狂刪咭上那些要命的字~ 再扔o左張咭入垃圾桶......家姐一見到, 就話我"浪費!" 對方之後一知道被我拒絕o左, 就開始"因愛成狠"~ 對方做o左d咩我唔詳細記低, 但總之佢係一個極度無品o既男生, 難怪我諗o左好耐先可以記得番佢個命~~

第二個...係中二o既事, 跟對方好o岩傾, 佢日日都會打電話俾我, 仲曾經同佢出過兩次街~ 無可否認我o地相方都係有好感o既... 然後有一次佢o係電話中向我示愛...那一刻我才發現原來我根本唔想同佢一齊, 需知道"有好感"唔等於要"o係埋一齊", 結果我好狠咁同佢講:"我o地無可能ga..."佢話:"我知~"但無幾耐佢又同我講多次"鍾意我"...佢根本就"唔知"... 最後我同o酉所有屋企人講, 但凡有男仔打電話俾我, 我一概唔聽, 叫佢o地幫我打發o左去... 雖然無接電話, 但返學都會見到ga ma~ o個排我日日返到學校都會見到佢好"哀怨"咁望住我...>_____< 之後升o左上中三, 大家唔同班, 有一日我同番佢傾偈, 諗住大家都已經無咩o野, 咁o岩o個陣我就o黎生日, 然後...佢有日送o左一份禮物俾我...係用一個心心盒裝住o既水晶蘋果...當我暑假搬o左屋, 我都無俾我o既新電話號碼俾佢.
雖然我驚o左佢好耐, 但我記得佢為我做過一些令我心動的事: 當我出o左街, 佢會預番咁上下時間, 打電話去我屋企, 睇下我是否已安全歸家; 對方曾經在那些"什麼什麼樂園"裡, 為我夾過一隻公仔o黎送俾我; 對方仲...曾經為我o係籃球場的半場作了一個漂亮的射籃......(係"半場", 唔係"三分波"咁簡單~) 最後佢找到一位跟他很相配的可愛女生, 感情仲唔錯tim~ 我都好戥佢高興~~^.^

第三個...對方總是o係我最需要佢o既時候出現~~ 真係...d時間準到你唔信, 係十次有八次我想打電話俾佢, 佢就會早我一步打電話o黎~^^ 最記得有一次我病o左(嚴重感冒, 瞓o左o係張床o度), 佢打電話o黎, 一知道我未食o野, 屋企又無人煮o野俾我食, 就話要o黎買粥俾我食(係o係新界搭車過o黎九龍...)結果我當然話唔駛la~ 雖然最後佢無o黎到, 但...佢一講話要o黎買粥俾我食, 我已經好感動la...
人與人之間的相遇真的好有趣, 我們曾經鍾意過對方, 是因為他o係我最軟弱的時候出現; 我需要被人照顧, 佢係一個大男人, 需要有個人被他照顧...只是最終我沒有跟他在一起, 因為雙方都好清楚: 一旦成為情侶, 分手過後大家都會做唔番朋友...這是我跟他的共同理念...

(下篇續)