〈失眠〉         
2018-03-05                                     

毋知這是第幾个暗暝
窗外的雨聲落袂停 

有時陣想欲攑筆寫批予恁
共恁講這幾年阮的生活
厝內大細攏平安
只是無恁的陪伴 

毋知這是第幾个天光
窗外的白頭鵠仔猶原唱著相仝的歌 

這馬恁遐是幾點
敢有仝款的日頭仝款的月光
我有真濟問題想欲問
天地遐爾仔闊人生遮爾仔短
欲坐佗一班車會當到恁遐
欲睏偌濟時間才會佇夢中遇著恁

這是恁離開的一冬過一冬
阮照常一工三頓
有時笑咍咍有時受氣流目屎
這咧世界猶原日出日落踅袂停
每一个人攏有伊講袂出喙的心酸 

這是咱做伙生活的土地
春天厝邊的花真芳
冬天牽恁的手真溫暖
毋知窗外的夜雨當時會停
毋知明仔載白頭鵠仔敢是唱著仝款的歌
毋知恁敢有好好歇睏 

我恬恬佇遮等候天光
我恬恬佇遮思念著恁