由於(上/下)二篇文章實在太煩瑣,而且加入左好多感想,唔係咁方便大家閱讀,所以推出左呢篇無乜個人感受的純行程分享版.希望大家讀起上黎容易d得到沙巴的旅遊資訊.

由2007年2月起澳門亞洲航空開始直航沙巴州.
上網訂來回連機場稅雜項約HK 1000/人.<--建議自己上網book機票同埋酒店.

今次跟康泰團出發,團費加埋雜費HK 3800/人.<--上網book約HK 3000/人(同一酒店同一班機) 亞洲航空網址 http://www.airasia.com/

五日四夜沙巴州哥打京那峇魯(Kota Kinabalu)行程駛費大約:團費HKD 3800+飲食玩樂HKD 1500=Total HKD 5300

二月十日 Day one

1635班機,要提前二個小時到達機場,康泰安排工作人員幫忙CheckIn,出現少少問題.<--因為book機票同confirm用左唔同護照,好彩帶備葡國護照同特區護照!有驚無險.
--(建議)帶備二份護照,以防意外發生,要返屋企就麻煩啦!
--(建議)Airasia唔包飛機餐,最好自備少量零食飲料同埋耍樂工具!總共三小時機程~
1930到達Kota Kinabalu機場<--新機場無得換錢
--(建議)澳門各大對換店先行匯兌,匯率HK 100=RM 44.4,沙巴酒店有得兌,但係匯率低好多,唔抵!
2000康泰導遊EdmondChan接機,先去土風舞晚宴.<--表演時間1800-2030,最多只睇到最尾歌part.
--(提示)自由行可以機場外直接坐的士,入巿區10-20分鐘,機場近門口有旅遊姐姐,提供地圖及資料!
2200到左酒店Sutera Harbour Resort & Spa(Magellan Wing)絲綢海峽度假大酒店(密哲倫翼)<--稍稍遠離巿區,比較有渡假Feel(出巿區十零分鐘車程).
--(提示)呢間酒店係沙巴的當地五星,唔係國際五星! 酒店設施:5個泳池/小沙灘/私人碼頭/俱樂部(保齡,桌球...)


二月十一日 Day two

早上自由活動或者跟導遊去玩!我選擇前者~
0900起身<--早d起身可以遊早水或者跑步
--(提示)酒店包埋自助早餐.<--種類好多,有四日可以慢慢試(推介:法式果仁包切片,過火之後查牛油,正!)
1000出發去巿區Sunday Market.<--的士唔會睇錶,只計遠近路程,一般RM10.
--(提示)Sunday Market係一個只開星期日上午的地攤巿集,有生果,盆栽,衣服,書刊,郵票等等,係一個雜貨集中地,而且價錢公道(部份檔主識講英文/華文)
--(購物分享)
榴槤2個,RM14 (*****必試推介,榴槤Size好細,但d核都好薄好細粒,好甘甜,香味濃郁,不過略嫌熟過頭)
青皮芒果2個,RM5(***推介,中等size,食落似泰國青芒,唔係好甜)
紅毛丹10粒左右,RM1.2(**,一般水準)
桔仔水RM1.0(****必試推介,隨便一檔見到有綠色桔仔浮下浮下就買得,清清甜甜幾好飲,另外仲有D加左色素的飲料,太鮮艷無試~)

1230午飯時間,沿大路向北行三個街區,到左大雅(Daya)酒店樓下的Little Italy意大利餐.
--(飲飲食食) Hawaii pizza (****必試推介,薄底芝士味濃郁)/ 寬條麵(***推介,有好多款種類的麵,唔識字可以睇圖,連D汁底都有圖)/ 海鮮湯(****推介,同寬條麵D汁差唔多味)/ 蘑菇湯(***,是日餐湯)/ 飲品兩客,一共食左RM85.
1310行街街,去左對面Wisma Merdeka<--順道係相鋪買左部水底相機(27張)RM39.時值農曆新年前夕,好多年貨擺設.
--(提示)商場入面有兩間找換店,如果唔夠錢駛可以係呢度換~
1320酒店北門有的士候客RM10.

1445跟導遊安排紅樹林遊船河+螢火蟲<--先去朱古力店俾導遊賺錢,Beryl’s牌朱古力味道一般啦~有得試食!
--(購物分享)熱情果/菠蘿(75g)/咖啡味(120g),平均RM20蚊一盒.一d都唔平!
1730到達紅樹林的屋仔<--先飲個下午茶,茶點:東甩(* 好多油)/炸不知名的野(* 好多番炸的油)/黃薑飯(**推介,少少辣幾好味,肚餓嘛!)
1745紅樹林遊船河+長鼻猴<--受相機所限,影唔到佢個真面目,但係都算遠距離睇到佢個長鼻,住得好分散,最多一次見到一家9口.
--(建議)有近視的配過副合適的眼鏡,想影相就買過部專業相機(大大舊歌d),無錢就借啦!
1830回程<--同場加映落日晚霞,夕照餘輝好靚呀!
--(飲飲食食)咖哩雞/辣蟹/炒菜/香料肉/湯米粉<--地點係下午茶的屋仔,味道就家常便飯中規中矩咁啦
1850觀賞螢火蟲<--開船3分鐘,就看到河兩岸的樹上,滿佈點點聖誕樹的燈光.導遊話: 呢d就係螢火蟲!下~每棵樹都有成千隻螢火蟲,好壯觀呀~
--(免費加送)抬頭望向天空,嘩~ 好美的一幅星河圖!夜空中滿是閃耀晶亮星星.
--(提示)周圍好多蚊同埋黑壓壓一片,記得事前噴多d蚊怕水啦!唔好諗住自己打蚊~
--(建議)旅行前上網到天文館download一張當月的星空圖,咁就可以邊欣賞邊係女朋友面前扮下有學識丫!嘻嘻~
--臺北市立天文科學教育館星空導覽網站 http://www.tam.gov.tw/
(天象資料-->重要天象-->每月星空導覽)佢個Link成日變, 自己入去搵啦!
1915回程<--門口有小賣部售賣榴槤雪條,幾清甜同埋好濃郁榴槤味.
--(提示)認住原裝TALUWANG牌啦!(RM1.5/條)其它係翻版~
2230酒店大堂<--一日行程完,全日駛費RM172.2
--(提示)食唔飽的話可以出去海鮮大排檔,開到零晨~


二月十二日 Day three

0830起床+酒店自助早餐<--今日有唔同款色喎.(推介:圓形薄餅,可以配咖哩雞/香料牛肉,或者查牛油落砂糖)
--(提示)當地天氣時晴時雨,多數下午三點零四點落雨,出發前睇下天氣預報,Plan定行程.
--(五天氣象預報)http://www.wunderground.com/global/stations/96471.html
1000出發去巿區北面的碼頭玩浮潛.<--事前己於Wisma Merdeka買麵包餵人同餵魚.
--(提示)有兩個碼頭,一個係Sutera酒店私人碼頭,一個就係北面的公眾碼頭,當然酒店碼頭的行程比出面貴得多啦!岩d行多步諗多樣都唔願的人去玩.
--(建議)食早餐前去book定酒店免費巴士,整點出發,係Wisma Merdeka落車行過去碼頭只需10-15分鐘.又或者方便d坐的士去(RM15).
1030踏入碼頭就有人兜生意,一入碼頭右手邊第一間店報名同埋交環保費.<--當地規定左只能玩到1500.無得加鐘~
--(價格)按人均算:一個島RM27,二個島RM33,環保費RM10,救生衣+浮潛用品RM15,入島費RM10
--(提示)玩兩個島加埋都只係RM68/人,如果跟導遊要RM120/人,水上活動例如香蕉船,降落傘,滑浪都比其它旅遊點(台灣澎湖/墾丁及馬拉刁曼島)黎得貴,可能旅遊旺季無得講價添~
--(建議)Sapi島比較大,但相對黎講遊客太多,魚又無乜(但係無理由唔去架,等於黎到澳門唔入葡京);Manukan島較細,但遊客少d,魚又多d,有藍色珊瑚紅色海參;Mamutik島好細,但係無乜遊客,好多細魚仔,同埋見到Nemo.但係浮潛唔夠時間玩三個島,二個就岩岩好啦~
1500回程返碼頭,中途停左船<--船家d油比人偷左,要等佢細佬黎救(等左10分鐘倒),差d以為要做湯漢斯流落荒島.
--(提示)問起船家釣魚的事,佢地提供book船出海垂釣,RM200/船,可以坐10人,包埋魚餌釣魚工具.如果跟團大約RM120/人.
--(提示)先去Wisma Merdeka放低曬相,夜晚食飯可以去拿相.RM13.45/27張相.
1545酒店,沖番個泡泡浴先!<--沖涼房有窗開向房間,呵呵~可以邊沖涼邊睇電視!
1730起行食海鮮.<--朋友及網友推介海皇城
--(飲飲食食)
酥炸軟殼蟹 RM8/隻x4 (****必試推介! 真係軟殼架,幾香酥細嫩,而且又平)
奶油老虎蝦 細RM18/隻x4 (****必試推介! 好大陣時時食芝士味,雖然佢係細size,不過仲大隻過澳門街巿買的大蝦)
薑蔥蒸象拔蚌仔 RM30/Kg (****好味推介.好鮮甜呀,底下的粉絲索晒d汁,好味!不過略嫌細隻左d)
白灼東風螺 RM30/Kg (***推介.好有東風螺味呀,不過就貴左d)
馬拉盞炒馬鈴薯菜 RM8 (***推介.抱住試新野的態度,食落幾好味喎!)
白飯 RM1/個x4 (**,個飯實在太細個啦!)
埋單總數RM185.4人均分每人HKD120.抵食啦!
1850經過一輪狂風掃落葉,係時候行街街消化下.
--(加送)朋友返酒店按摩,<--導遊d朋友上門推油按摩,中年師奶,價錢約200/1.5小時,不同力度要求可以事先同導遊講!唔包特別服務架~
1900去左Wisma Merdeka買麵包<--第二日用黎餵人同餵魚架,白麵包+朱古力包+蛋糕=RM6.4
--(購物分享)
係Central Market買左椰汁糕RM1(*,唔推介,食落椰汁糕咁啦!),榴槤個約RM15(*****推介,無之前歌個咁細核,但係成熟程度岩岩好,香味濃郁),仲有d炸細條春卷做手信(當然澳門有得買啦~但係無乜手信嘛)
行到CityPark附近買左新記的肉骨茶約RM10(****推介,D豬腸豬肚入晒味,但係要襯熱飲)
CityPark附近的大型超級巿場買包裝咖啡同香料做手信
2100酒店<--一日行程完,全日用左RM602
--(建議)夜晚有時間行下酒店周圍,呢晚就去左酒店個袖珍沙灘,坐係沙灘椅望住個星空,邊聽住海浪聲邊食榴槤(可以改為飲紅酒食芝士),海風吹埋黎好舒服呀!


二月十三日 Day Four

0830起身+酒店自助早餐<--又有唔同款的薯仔(推介:新鮮菠蘿片+木瓜片,好新鮮呀!)
--(自首)今日偷運蘋果同雞蛋做午餐,中國人嘛~睇開d啦!
0930酒店大堂集合,坐的士去碼頭.<--交環保費RM10x4=40.出發啦~魚呀!等我唷!
--(提示)記得帶埋之前浮潛的入島收據,再入島可以比少D錢架!
1000-1700船家不停咁換點比我地釣魚.<--我地六個人加埋船家共釣到廿幾條魚,有紅衫,碼頭,河豚,石斑呢,仲有條不知名的怪魚~
--(釣魚分享)我地直接用魚絲黎釣魚,所以手感好好,因為D魚得手掌咁大,所以唔怕比魚絲界親,但係都纏定膠布係食指好D.雖然一船可以坐10人,但建議5-6人,以免太多人d魚絲打結.
--(建議)如果有部份人唔係咁鍾意釣魚,可以叫船家放低佢地去玩浮潛先,至於另外歌D釣到咁上下見悶,可以Join埋一齊下午玩浮潛,咁樣就可以慳返之前玩浮潛的一日時間.
1715酒店沖身.<--沖得快的話,可以出去睇下日落.
1845出發食海鮮.<--可以去KK或者去返海皇城,有團友未試過海皇城,所以又再去海皇城.聽講KK的蟹好平好抵食,食的野同海皇城差唔多,價錢都差唔多!
--(飲飲食食)
蒸魚同煲湯魚<--我地釣的魚呀,加工費RM80,5條魚蒸(***蒸得老左d,但係好甜好好味),魚湯(**都唔識煲湯,落多左魚露,好鹹)
辣椒蟹 RM38/Kg (***推介,比澳門平,唔怕好辣,幾好味)
豉椒炒蜆 RM20/Kg(***推介,幾好味丫,同澳門一樣,見殼唔見肉)
蒜泥蒸扇貝RM30/Kg(***推介,都OK丫,幾鮮甜)
芒果蝦 RM38(***推介,剛推出的年菜,芒果酸酸甜甜,d蝦炸過,外脆內嫩)
炒豆苗 RM12(**,略嫌炒得老左少少)
桔仔冰 RM3/杯(***推介,好似小泉居的酸梅柑桔水咁,生津解喝!)
埋單總共用左RM282,6個人平均每人HKD120有找,好抵食!咦~個地好似搖下搖下咁,唔通...暈地浪?!
2030返到酒店<--一日行程完,全日用左RM585.45
--(建議)如果再早d可以去遊水,宜家咁夜去玩保齡呀桌球呀~四個人開左兩條line,RM80有找.

二月十四日 Day Five

0730起床0800出發<--去巿區的郵局買郵票啦~不過選擇唔多,連06年冊都未有.
--(建議)如果習慣早起,出去泳池玩下丫,D水仲暖暖地架~
1310班機回程<--導遊帶路去海味鋪買手信,榴槤味雪條,玉米味好多種.
--(提示)包裝的箱要度Size,記得有登機限制架~由於係新機場,存倉無冷氣架,所以唔比存d急凍的食物.
1750安全抵達澳門機場.

Mission Complete!!

呢個簡化版係咪易睇少少呢?
總結行程: 要玩得晒沙巴,大概要六日.
第一日去到,可以夜遊沙巴巿區,或者純粹返酒店休息;
第二日,神山+溫泉,夜晚係kk食海鮮,順道逛街;
第三日,三級激流(連車程大約8-9小時),夜晚應該無乜力氣出去食飯,試下酒店餐廳;
第四日,如果係星期日,朝早去sunday market,傍晚去紅樹林+螢火蟲;
第五日,釣魚加浮潛或者潛水,夜晚可以去海皇城食晚飯+逛街;
第六日,準備回程,早上出去飲個拉茶.
以上六日行程隨自己喜好加減啦~

加送少少資料啦:
神山--自由行可以book的士,大約RM350-400/車,如果跟導遊去大約RM175/人(包午餐同溫泉),另外加吊橋費RM5/人,帶普通相機RM5/人,帶數碼相機及攝錄機RM30.
Sutera Harbour Resort & Spa絲綢海峽度假大酒店的網頁 http://www.suteraharbour.com/new/

多謝各位支持~~~
豬豬一鞠躬

--頂圖為垂釣時友人攝
--底圖為馬拉最後晚餐(蒸魚為垂釣所獲)