昨昏下晡，中央電台用電話訪問我，談我的台文冊《驚驚袂著等》。

我本來就hân-bān（笨拙）講話，欲全程用台語講閣較無容易，一半擺會拍結。

不過，也有得著一寡仔啟示。

主持人提起彼篇「重要的三件代誌」，我順伊的話，講一年見一遍的朋友敢若醫生問診，問我「胃口好無？」「睏眠好無？」「排便呢？」

我講「睏眠好無」的時，主持人講，「喔，睏會落眠無」。

著喔，按呢講較有台語的氣口。講「好睏無」嘛真自然。

我也發覺朋友抑是訪問者，愛提出來講的文章攏無仝款；這並無稀奇，每一个人的眼光無仝款。不過，這嘛會當表示我這本冊內底趣味的、有意義的文章真濟。四月中新冊分享會進前，我家己選出來欲講的文章就用便利貼貼一二十篇呢。（結果，和廖玉蕙對談的時，嘛毋是講我按算欲講的。）

節目主持人問我出這一本冊，有啥物特別的心情？

我講提著這本冊的時，我有一點仔激動；我心內想，「毋是第一擺出版新冊，哪會按呢？」

寫台文比寫華文較困難，每一篇文章閣有玉蕙和我的後生做伙參詳，做伙「字斟句酌」；寫作的過程無仝，對這本冊的心情自然也無仝款。

毋但較感動，也較無謙虛，敢講，「我這本冊確實寫了真趣味，閣有意義！」

朋友攏知影我本底是真細膩（客氣）、也無啥自信的人；這陣，竟然無咧驚，敢誇口，是毋是因為驚驚袂著等？