斑葉紅雀珊瑚（與鬰金香）

    樓頂花葉萬年青湠（thuànn，蔓延）一大片，挖一欉種入去盆仔，提落來樓跤看媠。

因為近在眼前，和伊相閃身就會看著伊認真咧成長；無幾日前才看著一片青ling-ling的葉仔，今仔日隨看著兩个新穎（芽）抽長長，真感動，予人想著人定定咧講的『很療癒』。

本來厝內上慣勢囥（khǹg，放）的是鐵線蕨。伊的枝骨正經若鐵線，葉仔也青翠幼秀。一欉七八枝，姿態柔軟；徛（khiā，站）佇鞋櫃頂頭，予人感覺這个所在誠有氣質。毋過，伊也較嬌，一時無注意，葉仔就焦去、蔫去；看著加減會鬰卒。

所以，最近我決定較「平民化」，厝內「飼」好養的盆栽就好。我選花葉萬年青和斑葉紅雀珊瑚。兩種佇樓頂攏真濟，萬年青家己直直湠，紅雀珊瑚插枝就活。本來無關心in（它們）叫啥名，查網路了後知影，就較有感覺著in的價值矣。

講著我和植物的關係，就會想著一个故事：王陽明的朋友指壁巖中的花樹問，「天下無心外之物，如此花樹在深山中自開自落，於我心亦何相關？」王陽明回答，「你未看此花時，此花與汝同歸於寂；你既來看此花，則此花顏色一時明白起來，便知此花不在你心外。」

     花葉萬年青

 遮爾（tsiah-nī這麼）普通的萬年青和斑葉珊瑚，徙入來厝內，就入去我的心肝內矣；沃（澆）in，看in，攏較有感情。有時共葉仔掰（pué，撥）一下，算是和伊相借問，呵咾伊精神好。一遍我按呢掰的時，我的小妹講，「你這个手勢和媽媽的足仝呢。」

著喔，轉去員林的時，我也看過媽媽按呢掰植物，喙內講，「閣發新芽矣。」「葉仔誠有元氣呢。」

毋但動作親像，心情也仝款啊。

2019.3.24《聯合報》副刋