佇捷運頂頭，阿蓉手伸出來予我看，「我頂日共（kā，跟）你講的，就是這个錶仔。」

我講，「你無講，我根本袂注意你掛一个二十萬箍（元）的錶仔。」

伊講in翁交代欲去瑞士旅行的後生買一對某乜牌的錶仔的時，in囝誠意外，問爸爸是講真的抑是講假的？真的啊。伊袂放心，後來閣再問媽媽，確定一下。

「遐爾（hiah-nī，那麼）儉的人，穿插簡單，kan-na（只有）旅行的錢甘開，莫怪囡仔一時毋敢相信。」

In翁共囝和新婦（媳婦）講，「選恁兩人佮意（kah-ì，喜歡）的，以後錶仔會予恁。」

意思是欲傳落去的，in後生講，「恁會掛真久啦。」

既然是正經欲買，阿蓉的後生出國進前就先佇網路揣（tshuē，找），然後去錶仔店看。阿蓉共in翁講佇台北買，價數差一屑仔爾，何必予囡仔加麻煩。伊講彼無仝款，佇瑞士在地買，較有意義，貨色嘛可能較濟，較正。

結果，in囝佇琉森湖邊的錶仔店買一對。

去瑞士旅行的人一般攏會去琉森，遐的琉森湖有兩百外米長木造的橋，和八角型塔樓，是世界級的風景。湖邊幾若間名牌錶仔店，尤其是逐家會踏跤到的所在。將近三十年前，我和阮翁參加一个旅行團，也去過。阮入去錶仔店的時，真濟人隨（馬上）指定欲看「露螺（蝸牛）」，台灣人時行按呢稱呼Rolex；有的人大出手，一聲就買三、四粒。彼陣，台灣人有錢，買物件的氣口袂輸這陣的中國客。

一、二十萬的錶仔毋是我這款財力的人敢想欲買的，好佳哉也完全無興趣。毋過，我猶是「入境隨俗」，買一組套錶－－手錶以外，有耳鉤、短短的袚鍊和一个鉼針（pín-tsiam，別針），in幼秀幼秀，設計了真媠。規套才美金百外箍。

彼个錶仔早就歹去，這陣猶有咧用的是長長的鉼針；用伊來固定絲仔巾，真好勢。

我叫阿蓉共伊彼个貴參參的錶仔剝落來予我斟酌（仔細）看。伊出外猶毋bat（曾）掛過，舞一觸久仔（tsi̍t-tak-kú-á，一會兒），才共錶仔剝落來，予我試掛看覓。

我講，「遮爾重，我的手攑袂起來矣。」

是講笑的，不過，彼也確實有較重。阿蓉講著啊，本來掛的錶仔較輕；而且，才四、五千箍，掛著無壓力，毋驚拍毋見。「這款機械錶仔，無掛就恬去（停），著愛閣捘（tsūn，轉）發條，誠麻煩；囥（khǹg，擱放）佇厝內，也驚萬一有賊仔來，予人偷提去。」

「按呢，共伊鎖入去銀行的保險箱，較規氣（乾脆）。」我建議。

我講真濟年前，阮大姊夫看奢颺（tshia-iānn，擺派頭）的人掛貴參參的錶仔，講，「掛這款錶仔，時間敢會變較長？仝款一日二十四點鐘啊。」

其實，上奢颺的是伊的老爸。大姊夫一家伙仔日本時代bat蹛（tuà，住）佇上海，生活富裕；戰後搬轉來故鄉，阮親家猶慣勢大都市奢華的生活。啉咖啡，客廳鋪原木地板，曲盤（唱片）放落去，就會當跳舞；客廳、書房掛字畫、擺古董，閣有真大座的保險櫃。露螺手錶，連阮姊夫十外歲的小弟都掛過。

我也手伸出來予阿蓉看，「我這个錶仔，三十外年前的生日禮物，四千箍，是我所有的錶仔內底上長歲壽的。」

我掛過、會記得的錶仔大概六、七粒，這陣替換掛的有三个，紅色的，是一遍摸彩得著的；烏色的，是八、九年前佇日內瓦機場買的；另外一个就是這个上長歲壽的，銀色的Charles Jourdan。掛遮濟年，無反（ píng，翻）過來看，根本袂記得伊叫啥名。伊真勇健，毋bat修理過，kan-na過一段時間予人換電池。有兩擺，鉤仔開去落落去塗跤，有好心的人提醒，我才知影抾（khioh，拾）起來。看這个範勢（態勢），伊可能有法度予我掛甲變做傳家之寶。

用錶仔來傳家敢若袂bái，比珠寶較實用，猶閣有教示囡仔愛守時、愛惜時間的意思。我共阿蓉講，「以後，恁的囝、新婦若共in家己選的兩个錶仔掛佇手頂，就時時會想著恁矣。」

原載2017.10月號《文訊》雜誌