王孟婷插圖

算起來，已經超過二十年無揣（tshuē，找）過眼科醫生矣，而且，最近看電視，感覺面頂的字幕有較無清楚，嘛應該去檢查一下。

「食好鬥相報」，朋友推薦我去看替伊開刀的醫生；佇網路掛彼个名醫的號無簡單，過兩禮拜才掛著。醫生共我做幾若項檢查了後，講我的白內障猶真輕，毋免開刀；我目睭的問題是黃斑部。

是黃斑部病變？這个名詞這幾年誠流行，聽著就驚。菜市仔彼个豬肉砧的老闆舊（去）年才為著這款病開刀；每禮拜歇五工，拜六禮拜伊佇公家機關食頭路的囝才來代班。毋過，老闆手術的效果可能無啥好，最後不得已，豬肉砧褪（thǹg，轉讓）予別人去做矣。

好佳哉，醫生講我毋是病變，是「黃斑部皺褶」；伊解說，就敢若保鮮膜展無平，黃斑部造成幼幼的皺痕。

第一遍聽著這个名詞。想袂到我的面皮一年一年咧皺，目睭底嘛無咧閒，仝款共我製造皺痕。

醫生安排我去看另外一位專門治黃斑部的醫生，伊雖然講閣較詳細，我猶是聽甲霧嗄嗄；kan-na（只）知影手術後，會當看較清楚，毋過，白內障可能會變較嚴重，「到時才來處理。」伊講。

目睭是靈魂之窗，佇醫生的權威面頭前，我一時真有氣魄，開刀的日子，自費，手術用品單獨買，遮的細節攏決定好矣。

隔兩日，想著開刀是大代誌，講開就開，敢好？「到時才來處理」，聽起來竟然敢若咧處理肉砧頂的肉遐爾（hiah-nī，那麼）簡單！Kan-na想著可能需要閣開一擺刀，我就膽膽（怕怕的）。

就按呢，我去另外一間病院揣第二个醫生，另外一个朋友紹介的。這位醫生嘛誠有名，幾若年前，我一个同學就bat（曾）講起；毋過伊講，醫生tsit-má（現在）傷老矣。

這位醫生七十外歲，做各種檢查了後，也講我目睭的問題是「黃斑部皺褶」；但是，免開刀，開也無效。「人老，規身軀的器官攏會退化，這是無辦法的代誌；秦始皇求長生不老的藥仔無成功，經過兩千外年，也無人成功過。」

長生不老確實無可能，毋過現代人的歲壽愈來愈長；因為醫學的發達，一部份退化的器官嘛是會當改善，甚至換善心人捐出的抑是人造的。

無管按怎，免開刀，免痛，免驚有新症頭，我上歡喜。老醫生講我倒（左）蕊目睭視力比正（右）蕊較差；因為有受過傷。我講無啊，只是二十年前做過雷射；伊搖頭，講真濟醫生隨便做雷射，「結果就是按呢。」

伊叫我注意平常時的生活和食物，買葉黃素來補充。「無必要買貴的，一般的就好。半年後閣來檢查。」

這位醫生體格懸（高）大，腰脊骨直，看起來袂輸六十外歲；拍電腦的手扭掠（liú-lia̍h，俐落），視力也一定猶袂bái，才有法度做目睭的手術。所以我共彼个嫌醫生傷老的同學講伊有年齡歧視，「這位醫生年歲雖然有較大，人氣猶真好；欲掛伊的號著半暝十二點上電腦。」我紲落（接著）講出我的重點，「叫我免開刀的醫生，一定是較有本事的啦。」

半年後，我去複診，伊問我有啥問題無。我講最近不時感覺目睭焦焦澀澀；有一遍看畫展，竟然目睭痛甲無法度看完，這敢是「焦目症」？醫生替我檢查了後，講是焦目症，開人工淚予我，「有需要才點。」

可能我對人工淚無好感，一半遍點落就顛倒無爽快，目睭閣霧霧。朋友內底有焦目症的幾若个，有人教我食啥物補藥，有人指點我去揣某中醫，也有人教我做目睭的保養操。

我選擇免開錢無副作用的保養操，每日精神（醒），就用大頭拇（大拇指）的關節ma-sà-tsih （按摩）目眉骨和下面目睭皮二三十下，紲落雙手鑢（lù，摩擦）予燒，掩佇目睭頂，目睭仁（眼球）向正爿（右邊）、向倒爿360度轉；等手的燒氣無矣，閣再重複做。做幾遍？無一定。遮的動作做好，我才起床。

這款保養對我有效，根據我寫佇曆日簿仔頂的記錄，我的焦目症發作的機率愈來愈少；這年外，無講起，我已經袂記得家己bat有這个症頭矣。

所以，聽著有人為著焦目症喝艱苦，我就鼓吹伊試這套「手功」。我攏會講，「每日揣一个固定的時間做，變做習慣，才較有效。當然，目睭 tsîn（瞄準）電腦和電視的時間毋通傷久。」

到今，我猶是每一早照常做；我相信有做一定有較好，家己的目睭家己愛顧啊。

。原載2017.7月號《文訊》雜誌。