不三時若感覺跤頭趺（kha-thau5-u，膝蓋）怪怪，我就會拍豆奶來啉。黃豆有鈣質，對冇（phann3，鬆）去的骨質有幫助啊。

拍豆奶真簡單，共浸一暝的黃豆煮熟，冷矣，用果汁機拍就好。

真濟年前，我拍豆奶，是用猶未煮過的生黃豆來拍，拍好，著用布巾仔濾過，予伊變做漿；拍一遍濾一遍，尾後才規鼎囥（放）佇瓦斯爐頂煮熟。煮的時，著佇爐仔邊小心侍候，才袂予豆奶滾起來的時溢出來，也愛用杓仔直直抐（lah7，攪），才袂kiap鼎（沾鍋），非常麻煩。留落來的豆粕，因為專家講營養豐富，我嘛捌加蔥加卵來煎，可惜無好食，大人囡仔攏無愛；僅有的用途是做種花的堆肥。

一日，一个同事提一台會自動過濾、隨時流出豆奶的果汁機去辦公室展寶；現拍、現濾、燒燒的豆奶好啉，確實真方便。毋過，我對新型的機器無興趣。後來，知影原來黃豆仔拍較久，拍予幼幼綿綿就真好啉，無影響口感，就較捷（tsiap8，常）拍豆奶。

而且，功能少、傳統的老果汁機就真好用。

我講的豆奶，毋是一般講的「豆漿」；豆奶無經過過濾這个過程，一點仔都無拍損（浪費）。當然，也免煩惱豆粕的用途。

四百五十公克毋是基因改造的黃豆，我分做兩遍拍；半包拍出來的，大概是一个五人份電鍋的份量。家己拍的豆奶，真材實料，較芳，較洘（kho2，稠），一鍋仔（ue-a2）兩三工啉完，就無閣感覺跤頭趺怪怪矣。

你講這是心理作用？嘛是有可能。

管伊是毋是心理作用，有效就是「王道」。「心靜自然涼」，天氣熱的時，共一蕊雞卵花抑是玫瑰花瓣囥佇水盆內，我也是感覺有較涼啊。

原載2016.10.2《中華副刋》