見咁多人講 826 ，身為踢咗我兩個表妹入火海既主謀又點會唔提呢個日子呢。講緊既就係 w-inds. 放送會喇﹗

上星期六，凌晨 3 點幾已經俾阿媽嘈醒，跟住 4 點幾又嘈醒，兩次佢都係去廁所，好鬼眼瞓，到時唔知醒就香硬喇。不過好彩，可能我早起慣咗，5:30 鬧鐘一響，即刻彈起身，整裝待發，6 點正出門口。

打電話俾表妹時，點知俾佢阿媽盤問唔走得，我都話要瞓覺架啦。佢賴埋我帶壞你兩個就弊喇﹗結果我成功喺香港站搭 6:50 開出既巴士，7:15 去到數碼港。去到已經要排出面近天橋位置，唔係呀化﹖凌晨排隊架﹖好彩我排既位都有蓋地方，唔駛曬﹗係焗啫，但係表弟妹同跳舞既幾個朋友仔你哋喺邊呀﹖悶死我喇﹗

終於 8 點左右，見到佢哋一行 6 個人喇，唉，真係耐，但係後面已經好多人排隊喇，於是我叫佢哋排我度。突然間塞 6 個人入嚟，後面 D 人仲鬧有冇搞錯，我當時運高，聽唔到，好彩佢哋之後都不了了之。其他人又唔帶舖地膠袋，又唔帶嘢玩。幸好我有帶 POKER 啫，如果唔係真係悶抽筋。

玩咗好耐，等到一點左右，終於可以分批入場喇﹗今次有 7-up & 特製扇一把，唉早 D 派啦，熱死人喇﹗而我都準備咗一份禮物俾佢哋，不過唔知會唔會就咁擺喺香港，呢一世都唔會到佢哋度喇﹗入到去仲要等兩個鐘至到 3 點。表弟就慘 D，前後都冇位坐，一直企到走為止。期間司儀鄭家輝仲走出嚟搞氣氛，都 OK 啦﹗不過我一向對佢冇好感，好想佢快 D 收聲﹗

終~於~開始喇，首先就玩遊戲，鄭生負責郁 CAMERA，攝影師就 ZOOM 埋去睇下邊個中獎，之前佢係熄咗個機，到 ZOOM 定咗個電視就彈個人出嚟。咦﹖咁似我既。跟住表妹一號拍我『哎呀係你呀表姐』我仲好似夢遊咁，再望下個 MON，真係喎，之後先至識對住個鏡頭揮手同傻笑。得到既禮物係：舊年新單曲發售既香味蠟燭一個，要成 HK$1XX 架，好彩，仲要第一個中添。呵呵呵，總算有價值。之後表弟妹同朋友仔就冇咁好彩喇，冇中到。到播 PV 喇，大合唱真係好開心，雖然企喺度擔高個頭望住個大 MON，但係因為我哋好前，同喺中間對住兩個喇叭，好有 SURROUND SOUND FEEL。正因為咁樣，表妹二號朋友仔拍我，叫我望下二號，嚇死我，佢 D 眼淚啤啤聲咁滴出嚟，我同一號即刻摷紙巾俾佢，唉，睇 PV 已經咁喇，真係企喺佢面前咪嚇暈咗囉﹖之後佢既心情平復番，咁都冇咁驚咋。

之後既明天再續，好眼瞓，隻腳俾未攰完，聽日仲要跳舞添﹗


唉，佢哋都係咁攰，一於同佢哋一齊努力，我唔會輸架﹗