2006-07-01 01:19:20TANOSHI
同佢一樣…散晒﹗
今朝一直瞓唔到，本來 7 點至起身，6:30 自然醒咗﹗之後索性 6:50 起身擦牙洗面換衫喇，好似以前返學咁咁早起，7:25 去大蘿柚食大快樂，結果 9:00 準時到新公司，而當時新老細已經喺度喇﹗於是正式開工﹗
結果好快就知道：間公司叫做『百無公司』﹗咩都冇，連電腦都冇，你話死唔死﹖老細話下晝出去灣仔電腦城度買，而家用住佢部 Note Book 先啦﹗原來佢唔鍾意打電話聯絡既，因為電話費貴喎，於是，可以用 MSN 溝通，好嘢﹗之後叫我 Filing 番佢漫天飛舞既文件，結果打窿機又冇、釘書機又冇，唉﹗
救命﹗冇佢咁可愛﹗
呀﹗而家唔係講呢 D 嘢住﹗中午 12 點半俾兩個日本人叫咗去飲茶﹗兩個日本人全程用高速日文傾計，失驚無神又會突然問我嘢，搞到我唔駛食都俾佢哋嚇到想嘔喇﹗今日全程我發覺講我最多既唔係日文，而係國語，搞到臨走我有嘢問老細如果要先俾錢既嘢要點做時，佢都叫我用日文問佢，結果講講下日文，連我自己都唔知自己講咩，最終放棄用番國語問佢。佢話整份報價 FAX 俾佢啦，吓﹖文具都要報價，唔係化﹖
好彩有兩日假期啫，如果唔係我真係死得﹗
因為今日話晒第一日返工，梗係要著得斯文 D 既，咁咪著裙囉，襯對新平底皮鞋，結果朝早行到香港站已經痛喇，原來兩隻腳已經甩皮喇，真係痛到入肉，仲要忍痛來回電腦城，結果放工去地鐵站時，忍唔住去 OK 買膠布，真係攞命，聽日仲要去海洋公園同學跳舞添，殘廢都似喇﹗
貼此圖純粹鍾意呢件衫…既牌子﹗
上一篇：新挑戰正式來臨﹗Yeah 得喇﹗
下一篇：神經錯亂 @﹏@
cindy乜你去度柴灣返工呀?禁遠呀?好辛苦囉!
係呀﹗而且都未知會係點，但係有個咁難得既機會咪試下先囉﹗
我都支持你呀﹗過幾日再搵你啦﹗