星期四，約咗舊舊公司仲健在既同事一齊食 Lunch，因為過咗 6 月後，成間公司只係得番 CP 喺度咋，因為呢間公司大執位，而家變成有三個老闆，成日搞風搞雨既 Ann 姐終於被迫自動辭職（哈利路亞，阿們），Rita 又跳槽。而我又因為要去灣仔既唱片公司攞 T-Shirt，於是不如約下佢哋，嚟個最後的午餐囉﹗

見到 Ann 姐，即刻俾佢話我瘦咗（呵呵﹗）仲問我係咪好辛苦。我當然唔辛苦啦﹗最辛苦既日子都已經過咗去喇，而家係我放假既日子，都唔知幾歎﹗見到 CP，死喇，佢個頭而家同龍一差唔多（後面長度一樣，前髮 CP 就係短，龍一就係長，兩個都係黑直髮），本身佢兩個個樣又好似，搞到我有少少混亂，唔知究竟邊個似邊個。不過我唔會再咁蠢既﹗嘻嘻﹗

我哋四個坐卡位，坐位如下：

CP　　　Ann （一排）

　　枱

我　　　Rita （一排）


成個 Lunch Ann 姐都用一種好老懷安慰既眼神望住我，唉﹗拜託收埋佢啦﹗妳 D 戲好屎呀﹗所以我都費事啋佢，都係同 Rita 傾既多，CP 間唔中搭訕﹗其中同 Ann 姐傾番而家 D 人唔同晒既時候，我就脫口而出話得番 CP 係死剩種﹗當時 CP 同 Rita 講緊其他嘢，我以為佢聽唔到，點知佢同 Rita 講完隔咗兩秒就話：『我未走啫，唔係死剩種』『吓﹗你聽到既咩﹖』『我唔係聾既﹗』早知我加多句廢柴啦﹗

之後同佢哋講下我搵工方面，CP 就話佢個日本公司客好似請 Sales Coordinator，仲話同我問下，咁我放長雙眼睇佢問到幾時啦﹗好彩截至目前為止，已經有另一個未經證實既消息，係關於日本公司方面既，稍後落實咗至講啦﹗

就係咁食完一餐喇﹗之後我掛住同 Rita 講嘢，連 Ann & CP 唔見咗都唔知，跟住我就去攞獎品喇﹗