休息咗一個星期六，幾乎係同阿媽食完五十嵐之後就閉關自守，瞓番夠本。唔知點解，近排真係唔捱得夜。但係又鬼咁夜，成 2 點幾至死去瞓。真係 Lor li jean﹗

星期日，約咗開心果去街，其實係臨時摷佢出嚟，嘻嘻，因為星期六佢約我我又推咗佢，諗住第二日約番佢出嚟補數。但係唔想成日行荃灣、葵芳、油尖旺，諗咗一陣，不如行吓 APM 啦﹗

講真覺得自己好鬼 OUT，今次算係我第二次行 APM 咋，我同開心果好似保安巡場咁，逐層逐間睇，不過買唔到咩嘢，於是食完下午茶之後，就殺去隔離睇開倉貨﹗可能平民化適合我哋多 D 啦﹗我同佢去到嗰度都有收獲，買咗 Tee、化妝品、飾物、擺設等，佢仲買多對鞋添，加埋每人 $100 有找。卒之行到 8 點幾至返去 APM 食嘢﹗臨走仲買埋個袋，好老實講，我唔係 Hello Kitty 姐既Fans，但係唔知點解我都係逃唔過佢既五指山 (佢都冇手指既)﹗好對唔住 PC 狗呀~~﹗

上篇日記嗰條電話繩，我已經用緊條粉紅色喇﹗我將佢拆開咗，粉紅 Panda 就掛喺我個褲頭位度。不過另一條紅色既主人仲未得閒啋我，我會繼續報導呢兩隻 Super Lovers Panda 既情況，今日報告完畢﹗以上﹗