瞓咗 4 個鐘左右，就俾 D 賽車聲嘈醒喇。係喎，今日去睇賽車喎，好﹗早 D 起身食個早餐先﹗不過呢間酒店既早餐唔係好多款，又唔係特別好食，志在塞飽個肚嗰隻囉﹗因為我哋會睇下晝 3:30 嗰場三級方程式賽車，所以 11 點 Check Out 之後就坐的士去中央廣場直入大三巴﹗原來行入去都要成半個鐘頭，對於坐慣車既老頂嚟講，睇佢行到上氣唔接下氣。所以我哋都係行下又停下，仲睇咗一陣行番落嚟時食咩嘢﹗

我哋入咗去澳門博物館度參觀，入場費 $15，但係真係好多嘢睇呀，我哋睇咗好耐，又影下相，又玩下，行行下又唔見咗老頂，原來佢自己一個睇完走咗出去煲煙。費事理佢﹗我哋成班後生喺度就玩咗個半鐘，直至佢狂打電話俾 Ken 為止﹗

中午我哋食咗鍋貼、雙皮奶、豬扒包，豬扒包真係好好食呀﹗因為我連喺香港都未食過架﹗成日都覺得好多油，好肥嘛﹗皮脆肉滑，正﹗呢間係中央廣場一落車有間食雙皮奶既鋪頭，唔知係咪好出名既呢﹗食完差唔多 2:30，係時候坐番車去睇 Racer﹗"@ > v < @" ^ 0 ^ /

好彩我哋坐嗰區係有蓋位置，如果唔係就會變咗尋晚食既嗰碟“乳豬飯”喇﹗趁仲有時間我哋走咗睇買紀念品既地方，真係好靚呀﹗同時亦都好貴呀﹗佢哋狂買衫，我得個睇字，始終好貴﹗買唔落手，好彩臨尾大 C 屈到佢哋送幾條電話繩，我都分到有一條﹗入番去，開始喇﹗原來真係好嘈好嘈，係超高分貝，個心係會震架﹗因為會跑 15 個圈，差唔多成個鐘頭﹗所以跑到唔知第 6 個圈我就瞓著咗喇﹗最後我哋呢場好彩冇人命傷亡，冇見到 D 核突嘢﹗尋日嗰場就係有人死咗喇﹗慘﹗睇完頒獎時已經 5:30，返酒店攞埋行李就去咗附近既酒樓食飯。

間酒樓叫九記，我哋笑話唔係六就九，呢度 D 人改名真係好求其﹗我哋叫番 D 普通菜餚，平都有平既好﹗老頂之後又話要開紅酒，不過今次係兩支啫﹗埋單 $6XX，價錢 OK 啦﹗8 個人﹗加上佢又輸咗皮幾嘢嘛﹗哈哈﹗

返嚟香港時係坐飛翔船，同之前坐去既大船比真係定好多﹗老頂都冇暈船浪喇﹗我哋個個都瞓晒覺，仲辛苦過返工﹗我返到屋企都已經 10 點喇﹗第二日真係極度唔想返﹗不過冇計啦﹗鬼叫你窮呀﹗頂硬上﹗