尋日朝頭早，Rita 打電話俾我話因為 TT 病咗冇返工，Annie 話唔唱夜晚，如果照唱既會得番 4 個人，問我改唔改期，吓﹗又改﹖唔好啩。咁我話少人都去啦﹗費事又改期喇﹗點知出門口就落雨，有冇搞錯﹗咁掃興﹗

7:30 去到見到佢哋不停係咁食嘢，好似餓鬼咁。好搞笑﹗呀係，仲未講有邊幾個：Rita、阿婆、CP、同我。佢哋一路食嘢一路聽歌，我都係第一次聽“夕陽無限好”咋﹗原來成首歌最好聽既就係廣告嗰兩句，唉…我出去攞嘢食時，Rita 幫我哋點咗好多歌，咁當然，好多都變咗係佢唱，唔知大家記唔記得我話過佢唱歌，去到某個音就冇得再上去嗰隻，完全聽唔到自己走音，即係所謂既音痴﹗所以成晚有 1/3 時間係要受呢種折磨﹗不過可能慣咗，又唔覺得有啲咩嘢﹗但係講真，真係好辛苦。@~@

我哋大部分都係一個人唱，得好少歌係兩個唱，雖然我哋有 3 支咪﹗同埋今次得 4 個人，唔駛點樣爭唱。所以今次 CP 唱咗好多歌，我仲靜靜雞錄低佢唱歌把聲添。真係好似唐老鴨﹗我哋成晚好似去咗懷舊金曲夜咁，狂唱舊歌，CP 狂唱黎明，阿婆狂唱羅嘉良，Rita 狂唱容祖兒（勁走音版），我狂唱英文歌 + 濱濱 + 鄧麗君，不過我有點到王莞之既“我真的受傷了”，呢首都幾好唱，係音樂好細聲，變咗開頭好似讀緊書咁，不過把聲好似變咗范曉萱﹗唱到第三句，CP 走咗去廁所（就算 4 人房都附有廁所架﹗），我唱完成首佢至走番出嚟，駛唔駛去咁耐呀﹗不過佢話佢喺廁所都好清楚聽到我把聲（因為唱呢首已經成 11 點幾，之前有幾首我唱到冇晒氣，俾和音蓋過晒我把聲）。我心諗：好彩你聽到啫，我明唱俾你聽嘛。後來阿婆唱勁歌金曲（其實呢首一早點咗，不過我哋狂插歌唔俾佢唱，鬼咩，成 10 分鐘咁長。哈哈﹗）Rita 直情走咗去唔聽，CP 話唔識唱唔唱，我就休息一下個喉嚨，變咗成 10 分鐘係佢 Solo，搞到佢無晒氣，仲狂唱錯歌詞添，笑到我同 CP 死咁濟﹗CP 點咗“愛情影畫戲”，阿婆就懶醒大叫“愛情戲影畫”﹗全場爆笑﹗哈哈﹗跟住之後係必殺技﹗結果阿婆大傷完氣，放棄唔歌，俾咗 CP 唱。請大家想像一下唐老鴨唱必殺技係點樣既效果﹖﹖我都即刻走入廁所笑飽至出去。

大家喺 11:30 左右，已經個個把聲唔同晒，首首都走音﹗結果玩到 12:30 走人，今次咁少人唱，雖然會貴咗（Discount 少咗，今次每人 $165，上次 $156 ），不過我反而鍾意咁少人，起碼唔駛見到 Annie 同 Stanley。之後，CP 都好關心我點樣返屋企，問我係咪去旺角再轉車，我話因為而家 12 點幾啫，仲有地鐵搭。



『原來你有心﹗』



咁尋晚就咁散 Band 喇﹗遲啲再講﹗



PS 呢張相就係 w-inds. 既 PV Ageha，龍一個頭剪咗變成咁。